Cali Gacal Casir : Wadahadallada Galmudug iyo Ahlu Sunna ma'aha kuwo rasmi ah ee waa ''Siminaar''
Isniin, November, 27, 2017 (HOL) – Guddoomiyaha baarlamaanka Galmudug Cali
Gacal Casir ayaa waxba kama jiraan ku tilmaamay wadahadallada lagu waddo in
dalka Jabuuti ku yeeshaan mas’uuliyiinta maamullada Galmudug iyo Ahlu Sunna
Waljameeca, isaga oo sheegay in kulanka labada dhinac lagu tilmaami karo oo
kaliya Siminaar Aqoon kororsi ah.
Waxaa uu sheegay in shirkaasi uusan aheyn wadahadal rasmi, isaga oo ku
tilmaamay shirkii kan ka horeeyay ee ka dhacay Nairobi in uu iska ahaa oo
kaliya kulan is barasho iyo aqoon korarsi.
‘’Kulankii Nairobi ka dhacay iyo kan hadda la sheegay in uu ka furmayo
Jabuuti labadaba sida ay inoo sheegeen howlwadeennada shirka waa Siminaar ee ma’aha
kulamo rasmi ah oo heshiis lagu gaarayo’’ ayuu yiri guddoomiyaha baarlamaanka
Galmudug.
Sidoo kale Cali Gacal Casir ayaa sheegay xitaa haddii ay wada
hadalladaasi miro dhalaan oo heshiis lagu gaaro aqoonsan doonin baarlamaanka
Galmudug.
‘’Annaga uma aragno kulamo rasmi ah, laakiin xitaan haddii ay dhacdo in
heshiis lagu gaaro ma aqoonsan doonno ayuu yiri’’ Cali Gacal Casir.
Shirka Jabuuti ay ku leeyihiin madaxda maamulada Galmudug iyo Ahlu Sunna ayaa
waxaa gar-wadeen ka ah Urur Goboleedka IGAD.
Shalay magaalada Jabuuti ee dalka Jabuuti waxaa wada gaaray madaxweynaha
Galmudug Axmed Ducaalle Geelle (Xaaf) iyo ku xigeenkiisa iyo sidoo kale
madaxweynaha Ahlu Sunna Sheekh Maxamed Shaakir Cali Xasan, halkaasi oo ay ku
leeyihiin shir dib u heshiisiin ah.
Muddo dheerba waxaa soo jiray khilaaf xooggan oo u dhaxeeyay madaxweynaha
maamulka Galmudug Axmed Ducaalle Geelle Xaaf , ku-xigeenkiisa iyo guddoomiyaha
baarlamaanka Galmudug, hasse ahaatee waxaa muuqata in la xaliyay khilaafkii u
dhaxeeyay madaxweynaha iyo ku-xigeenkiisa oo hadda ku wadda sugan dalka Jabuuti,
laakiin dhinaca guddoomiyaha baarlamaanka ayaad moodaa in wali uu taagan yahay
khilaafkii kala dhaxeeyay madaxweyne Xaaf.
C/raxmaan Diini, Hiiraan Online
[email protected]
