Isniin, November, 27, 2017 (HOL) – Wajigii labaad Wadahadal u dhaxeeya Maamulada Galmudug iyo Ahlu
Sunna Waljameeca ayaa lagu wadaa in uu maanta ka furmo dalka Jabuuti, iyadoo
halkaa ay gaareen maalintii shalay mas’uuliyiinta labada dhinac.
Magaalada Jabuuti waxaa ku sugan Madaxweynaha Galmudug Axmed Ducaalle Geelle
Xaaf, Ku xigeenkiisa Maxamed Xaashi Carabey, hoggaamiyaha Ahlu Sunna Sheekh
Maxamed Shaakir Cali Xasan iyo xubno kale oo ka kala tirsan labada dhinac.
Dadka ka soo jeeda gobolada Dhexe ee Soomaaliya ayaa rajo wanaagsan waxa ay
ka muujinayaan in shirkaasi ay ka soo baxaan waxyaabo mira dhal ah oo ku aadan
wadahadalka labada dhinac.
Madaxweynaha Maamulka Galmudug Axmed Ducaalle ayaa dadaal badan ku bixinaya
sidii uu ula heshiin lahaa maamulka Ahlu Sunna oo ka arimiya deegaanno badan oo gobollada
dhexe ah.
Hogaamiyaha Ahlu Sunna Sheekh Maxamed Shaakir Cali Xassan ayaa dhinaciisa
sheegay in aysan marnaba diideen heshiis laga gaaro khilaafka labada garab,
balse ay jiraan dad arrintaa ka oso horjeeda.
Dowladda federaalka ayaa marar badan oo hore ku guuldareysatay in ay mideyso
labada maamul, hasse ahaatee waxaa hadda muuqata in ay soo faragaliyeen Ururo
caalami ah oo ka shaqeynaya siddii loo dhameyn lahaa khilaafka mudada dheer soo
jiray ee u dhaxeeya Galmudug iyo Ahlu Sunna.
C/raxmaan Diini, Hiiraan Online
[email protected]
