Axad, November, 26, 2017 (HOL) – Madaxweynaha maamulka Galmudug Axmed Ducaalle Geelle Xaaf iyo ku-xigeenkiisa Maxamed Xaanshi Carabey oo si wadda jir ah uga ambabaxay garoonka diyaaradaha magaalada Muqdisho ayaa gaaray dalka Jabuuti oo uu ka furmayo wadahadal ay la yeelanayaan mas’uuliyiinta sar sare ee maamulka Ahlu Sunna Waljameeca.
Madaxweynaha Galmudug iyo ku-xigeenkiisa oo khilaafo xoogan uu soo kala
dhaxgalay ayeey hadda u muuqataa in khilaafkaa la xaliyay, kaddib markii
madaxweyne Farmaajo uu kulamo kala duwan la qaatay dhinacyada iska soo
horjeeday ee maamulka Galmudug.
Madaxweyne Xaaf iyo kuxigeenkiisa Carabey ayaa si wadajir uga qeyb galaya
wada hadalka iyaga iyo maamulka Ahlu Sunna ku dhex mari doona dalka Jabuuti,
waxaana wada hadalkan garwadeen ka ah Urur Goboleedka IGAD.
Hogaamiyaha maamulka Ahlu Sunna Sheekh Maxamed Shaakir Cali Xassan oo
wareysi siinayay Laanta BBCda ayaa sheegay in dhinacooda doonayaan in la mideeyo
labada maamul oo yeelanaya ayuu yiri Hal Calan, Hal Baarlamaan iyo Dastuur
heshiis lagu wadda yahay.
Wadahadalada labada dhinac ayaa wajigii hore lagu qabtay magaalada Nairobi,
waxaana uu ahaa mid Madaxweyne Xaaf aanay cidna ku wehlin wada hadallka., hase
ahaatee marka waxaa ku soo biiray oo qeyb ka noqonaya madaxweyne kuxigeenkiisa
iyo xubno kale.
C/raxmaan Diini, Hiiraan Online
[email protected]