Hiiraan Online
4/29/2024
Today from Hiiraan Online:
Home
Somali Map
Sports
Opinion
RSS
Somali Music
Contact Us
Facebook
Twitter
Google Plus
Wararka Maanta- Axad, Nov 26, 2017
Golaha amniga dowlad goboleedka Jubaland oo ka shiray amniga Jubooyinka
Axad, November, 26, 2017 (HOL) - Kulanka ay maanta yeesheen golaha amniga dowlad goboleedka Jubaland oo uu dhawaan magacaabay madaxweynaha dowlad goboleedka Jubaland Mudane Axmed Max’ed Islaam ayaa waxa ay uga doodeen arimo dhowr ah oo la xiriira amniga deegaanada Jubooyinka.
Kulanka oo uu shir gudoominayay Madaxweynaha Jubaland oo ah gudoomiyaha golehaasi ayaa looga dooday dhinacyada sidii loo qaban lahaa deegaanada Maqan Jubaland, dhinacyada dhaqaalaha, abaabulka shacabka iyo sidii loodhameystiri lahaa baahiyaha ciidamada dowladda Soomaaliya iyo kuwa dowlad goboleedka Jubaland.
Wasiirka madaxtooyada Jubaland Mudane Axmed Sitiin oo markii uu kulanka soo idlaaday warbaahinta la hadlay ayaa sheegay in dhammaan arimaha looga hadlayay kulanka ay qeyb ka yihiin dadaallada ay wado Jubaland ee la doonayo in howlgallo looga bilaabo deegaanada Jubooyinka.
Wasiirka ayaa intaa ku daray in qorsheyaasha amniga ay la tagi doonaan shirka golaha amniga qaranka si loo dardar geliyo dadaallada ay wado dowladda dhexe ee la doonayo guud ahaan dalka looga saaro Al-shabaab.
“Waxaa sidoo kale shirka looga hadlay arimaha garsoorka, in la dhameystiro dhammaan dhismeyaasha maxkamadaha iyo garsoorka dowlad goboleedka Jubaland heer degmo ilaa heer tuulo,” ayuu wasiirku hadalkiisii raaciyay.
Bishii April ee sanadkan ayay ahayd markii madaxda dowladda dhexe iyo dowlad goboleedyada shir ay ku yeesheen magaalada Muqdisho ay uga dhawaaqeen golaha amniga qaranka oo uu gudoomiye u yahay madaxweynaha dalka, waxanaa Jubaland ay noqotay dowlad goboleedkii ugu horeeyay ee dhista guddi amni qaran oo heer dowlad goboleed.
Xasan Nuur, Hiiraan Online
[email protected]
Kismaayo-Soomaaliya.