Axad, November, 26, 2017 (HOL) – Diyaarado siday gargaar dawo ah iyo
shaqaale caalami ah ayaa maanta ka degey garoonka diyaaradaha magaalada Sanca
ee dalka Yemen saddex toddobaad kadib markii isbahaysiga uu hogaamiyo Sacudigu
mamnuucay in wax gargaar ah la geeyo wadanka Yemen.
Mid ka mid ah diyaaradaha ayaa waxa ay sidey daawooyin u badnaa tallaalka
carruurta oo aad loogu baahnaa halka labada diyaaradood ee kale ee maanta
gaaray magaalada Sanca ay sideen shaqaale Qaramada Midoobay iyo shaqaalaha
hay’ada Laanqeyrta Cas.
Xayiraada gargaarka ayaa waxaa lagu soo rogey dalka Yemen kadib markii
gantaal ay rideen kooxda Xuutiyiinta uu gaaray caasimada Sacudi Carabiya ee
Riyad, balse gantaalka ayaa laga hortagay oo la qarxiyay inta uusan dhulka ku
soo dhicin.
Inkabadan labo kun oo ruux ayaa u dhintey cudurka daacuunka sanadkan dalka
Yemen halka dagaalo socday tan iyo sanadkii 2015kii ay ku dhinteen dad ku dhow
sagaal kun oo ruux.
Hay’ada UNICEF ayaa sheegtay in ay geysey magaalada Sanca inkabadan 15 ton
oo ah talaalka cudurka gowracatada iyo Teetanada iyo cuduro kale oo laga
hortagi karo.
WHO ayaa horaantii toddobaadkan sheegtay in cudurka diptheriyada uu ku sii
fidayo maadaama aan carruurta aysan heleyn tallaal,dhakhaatiir ku sugan
magaalada Hodeidana waxa ay sheegeen in saddex carruur ah ay u dhinteen
cudurkaas.
Isbahaysiga uu hogaamiyo Sacudi Carabiya ayaa oggolaaday in gargaarka la
geyn karo Sanca balse waxa ay diideen in gargaar cunto iyo dawooyin ah la geeyo
magaalada Hodeida oo ka mid ah magaalooyinka ay mucaaradku haystaan.
C/raxmaan Diini, Hiiraan Online
[email protected]