Madaxweyne Farmaajo oo tababar u furay dufcadii ugu horeysay dhalinyaro ku biirtay ciidamada
Sabti, November, 25, 2017 (HOL) - Madaxweynaha Jamhuuriyadda Federaalka
Soomaaliya Maxamed C/llaahi Farmaajo ayaa maanta kula kulmay dugsiga tababarka
ciidamada booliiska ee Jenaaral Kaahiye 600 oo dhalinyaro si
mutadawacnimo ah ugu istaagay in ay ka qayb qaataan dagaalka ka
dhanka ah Al-shabaab.
Dhalinyarradii uu la hadlay waxaa ay
xaqiijiyeen sida ay uga go’antahay in ay furimaha dagaalka ku
weheliyaan ciidamada xoogga si ay uga qayb qaataan difaaca dalka
Madaxweynaha Soomaaliya ayaa sheegay in uu ku boogaadinayo dhallinyarada sida ay uga dhiidhiyeen falalka
Al-shabaab ay ku hayaan shacabka iyo ga’aanka geesinimada ah ee ay u qaateen
sidii ay qayb uga noqon lahaayeen difaaca dalka.
“Waxaad tihiin dufcaddii ugu horraysay ee dhalinyaro ah oo ka jawaaba
baaqaygii, una istaagay in ay nafootada u huraan dalkooda, in ay u dhintaa
diintooda, in ay difaacdaan dadkooda. waxaad tihiin Mustaqbalka
Soomaaliya. Waddan walba oo xaaladahan oo kale ay la gudboonaadaan waxaa
badbaadiya dhalinyaradiisa.”
Madaxweyne Farmaajo ayaa xusay kaalinta ay ku leeyihiin dhallinyarada
Soomaaliyeed horumarka dalka,isagoo sheegay in 70% boqolkiiba ay yihiin dhalinyaro,wuxuuna
ku boorriyay dhallinyaradaasi in ay u istaagaan sidii dalka looga sifeyn lahaa Ururka
Al-shabaab ee dhibaatada iyo gumaadka ku haysa shacabka Soomaaliyeed.
C/raxmaan Diini, Hiiraan Online
[email protected]
