Madaxweyne Waare : Waa in aan ka dhabeyno nidaamka federaalka ah ee aan qaadannay
Sabti, November, 25, 2017 (HOL) - Madaxweynaha maamulka Hirshabeelle Maxamed
Cabdi Waare oo faah faahin ka bixiyay go’aan
ay wada jir u soo saareen madaxda dowlad gobolleedyada, ayaa sheegay in
dowladda federaalka looga fadhiyo fulinta qodobadii lagu heshiiyay shirkii ugu
danbeeyay ku dhaxmaray magaalada Muqdisho.
Madaxweyne Waare ayaa sheegay in qodobadii lagu heshiiyay shirkii dhawaan
dhaxmaray dowladda dhexe iyo maamul gobolleedyada uu ka mid ahaa qodob dhigayay
in laga waddatashto hindise sharciyeedyada xukuumaddu soo gudbiso ka hor inta
aan la horgeyn baarlamaanka Soomaaliya.
‘’Shirkaa markii uu noo qabsoomay kaddib ilaa iyo hadda waxaan ognahay in
dhowr hindse sharciyeed la horgeeyay baarlamaanka Soomaaliya oo ay soo gudbisay
xukuumadda, waxaa wanaagsan in aan fulino wixii aan ku heshiinay, Annaga
ujeedaddeenu waxaa ay tahay in marka hore hindise sharciyeedyada leysla eego
qodobada ku jira, waa in fikradeena iyo dareenkeena lagu daro sharcia, waa
waddatashi oo kaliya ee wax kale aan u jeedo malaha’’ ayuu yiri madaxweyne
Waare.
Waxaa uu sheegay in mar haddii la qaatay nidaamka federaalka loo baahan
yahay in loogu dhaqmo si dhab ah ama sida uu hadalka u dhigay leyskaba daayo
nidaamkan.
‘’In aan federaal qaadanno oo aan ku dhaqanno iyo in aan si ragganimo ah
inta aan iskugu imaanno aan dhahno federaal nama anfaco wax ka dhaxeeya
malaha, laakiin inta aan Federaal qaadno, hadana aan u dhaqanno sida
dowladda dhexe oo kale, taas ma ahan wax soconayo”ayuu yiri Waare.
Madaxweynaha maamul gobolleedka Hirshabeelle Maxamed Cabdi Waare ayaa
guddoomiye ku-xigeen ka ah golle ay ku mideysan yihiin madaxda dowlad
gobolleedyada dalka dhisan.
C/raxmaan Diini, Hiiraan Online
[email protected]