Kenya oo sheegtay in ay ku soo fool leeyihiin deegaannadeeda Boqolaal ka tirsan xoogagga Al-shabaab
Sabti, November, 25, 2017 (HOL) - Dowladda Kenya ayaa sheegtay in ay ku soo
wajahan yihiin boqolaal ka mid ah dagaalyahanada Al-Shabaab ,kuwaa soo ka soo
cararay duqeymaha dowladda Mareykanka ay ka waddo Koonfurta Soomaaliya.
Kenya waxa ay sheegtay in ay jirto cabsi weyn, Maadaama ay doonaayaan
dagaalyahanada Al-Shabaab in ay kasoo baxaan Soomaaliya , islamarkaana ay
gudaha u galaan Kenya.
Saraakiisha ammaanka waxa ay sheegeen in ciidamo badan oo isugu jira boolis
iyo Milatariga ay geeyeen xadka Soomaaliya si ay uga hortaggaan in ay soo gudbaan
dagaalyahanadaasi.
Agaasimaha Hawlgalka Kenya ka wado Kaymaha Booni, JOSEPH KANYIRI ayaa sheegay
in Al-Shabaab ay bilaabeen bixitaankooda Soomaaliya todobaadkii lasoo
dhaafay.
Waxaa uu sheegay in dowladda Kenya ay u diyaar garowday in ay is difaacdo
dagaalamayaasha Al-shabaab
Waxaa uu sidoo kale tilmaamay in ay bilaabeen howlgallo ka dhan ah
Al-Shabaab, islamarkaana ay jirto Cabsi badan.
Dadka Kenyaanka ee ku sugan xadka Soomaaliya ayuu ugu baaqay haddii ay arkaan
dagaalyahannada Al-Shabaab in ay kusoo wargeliyaan ciidamada Ammaanka.
Dowladda Mareykanka ayaa bilihii lasoo dhaafay si weyn u xoojisay duqeymaha
ay la beegsanayso meelaha ay ku sugan yihiin dagaalyahannada Al-Shabaab.
C/raxmaan Diini, Hiiraan Online
[email protected]