Arbaco, November, 22, 2017 (HOL) – Ururka Al-shabaab ayaa waxba kama jiraan
ku tilmamaay war ka soo baxay taliska Mareykanka ee Africa iyo dowladda
Soomaaliya oo lagu sheegay in duqeyn lagu dilay 100 dagaalyahan oo ka tirsanaa
Ururka deegaan hoostaga degmada Diinsoor.
Afhayeenka howl galada Al-Shabaab C/casiis Abuu Muscab ayaa waxba kama
jiraan ku tilmaamay in duqeyn Mareykanka fuliyay lagu dilay 100 dagaalyahan.
“Waa waxba kama jiraan warka ka soo yeeray Mareykanka ee ah inay duqeyn la
beegsadeen Mucaskaraadka Mujaahidiinta, waa war aan sal iyo raad toona
laheyn”ayuu yiri Abuu Muscab oo la hadlay Warbaahin ku hadasha Afka Ururka.
War qoraal ah oo ka soo baxay Taliska Mareykanka ee Africa ayaa lagu sheegay
in duqeyn cirka ah oo shalay oo Talaado aheyd ka fuliyeen meel 125 mile u jirta
Muqdisho ku dileen illaa boqol askar oo ka tirsan Al-Shabaab.
Mareykanka ayaa waayadii ugu danbeeyayba joogteeyay weerarrada duqeynta loo
adeegsado ee ka dhanka ah fariisimaha Al-shabaab ay ku leeyihiin gobollada
Koonfurta iyo Bartamaha Soomaaliya.
C/raxmaan Diini, Hiiraan Online
[email protected]