Dowladda oo sheegtay in 100 dagaalyahan oo ka tirsanaa Al-shabaab lagu dilay degmda Diinsoor
Arbaco, November, 22, 2017 (HOL) – Dowladda ayaa faah faahin dheeraad ah ka
bixisay weerar qorsheysnaa oo ciidamada Mareykankan ah oo kaashanaya kuwa dowladda Soomaaliya ka fuliyeen deegaanno ka
tirsan gobolka Baay.
Wasiirka wasaaradda Warfaafinta xukuumadda Soomaaliya C/raxmaan Cumar Yariisoow
ayaa sheegay in ciidamada Mareykanka oo kaashanaya ciidamada xoogga dalka
Soomaaliyeed duqeyn ay la beegsadeen xero tababar oo ku taalla
deegaan lagu magacaabo Buur Ceel cade oo hoos taga degmadda Diinsoor ee
gobolka Baay.
Wasiirka, ayaa xaqiijiyey in duqeyntaasi lagu dilay sidda uu sheegay
Boqol dagaalyahanno iyo saraakiil isugu jiray oo ka tirsanaa Al-shabaab.
“Dowlada Federaalka waxaa ka go’an
dardargelinta la dagaalanka Al-shabbab, duqeyn laga fuliyay xero tababar oo ku taala deegaanka Buur Ceel Cade ee degmada
Diinsoor ayaa looga dilay 90 – 100” ayuu yiri wasiir Yariisow.
Taliska Mareykanka ayaa sheegay duqeyn diyaaradaha aan duuliyaha laheyn ay ka
fuliyeen Gobolka Baay barkhanimadii shalay in lagu dilay 100 dagaalame oo ka
tirsan Shabaab.
Afhayeen u hadlay Al-shabaab ayaa wuxuu sheegay in aysan jirin duqeynta
Mareykanka ay sheegeen in ay ka fuliyeen gobolka Baay.
Todobaadyadii ugu danbeeyayba waxaa sii xoogeysanayay weerarrada ka dhanka
ah Al-shabaab oo ay fulinayeen diyaaradaha dagaalka Mareykanka iyo ciidamada
dowladda Soomaaliya.
C/raxmaan Diini, Hiiraan Online
[email protected]
