Taliyaha ciidamada xoogga dalka Soomaaliyeed oo booqday saldhigga Militari ee Turkiga
Isniin, November, 20, 2017 (HOL) - Taliyaha
ciidamada xoogga dalka Soomaliyeed Jen Cabdiwali Jaamac Xuseen Gorod ayaa maanta
booqday saldhiga dowlada Turkiga ee magaalada Muqdisho.
Taliyaha ayaa kulan la qaatay saraakiil Turkish ah oo halkaa tababar ku
siineysa ciidamo ka tirsan xoogga dalka Soomaaliyeed, wuxuuna ka dhageystay
warbixin ku saabsan sida tababarka uu u socdo, isagoo sidoo kale kormeeray
qeybaha Cuntada, Jiifka, Tababarka iyo Fasalada ay ku wax ku bartaan ciidamada.
Jen Gorod ayaa khudbad dheer u
jeediyay Saraakiisha, Saraakiil xigeenada iyo ciidamada Tababarka uu u socdo, isagoo
ku booriyay in ay tababarka si wanaagsan kaga faa’iideystaan, maadaama uu yahay
mid tayo fiican leh isla markaana ay tahay fursad qaali ah oo ay ciidamada u
heleen in ay ku tababartaan saldhigan leh adeeg kasta oo ka jira saldhigyada
caalamka.
Wuxuu ku dhiiri galiyay ciidamada in ay yihiin Madaxda Mustaqbalka lagana
doonayo inay si wadaniyad iyo dal jaceyl ku jirto wax u bartaan.
Taliyaha ciidamada Xoogga ayaa sidoo kale u mahad celiyay saraakiisha dowlada
Turkiga ee tababarka bixineysa, wuxuuna si guud dowlada Turkiga ugu amaanay
doorka ay ku leedahay dib u dhiska ciidamada xoogga dalka.
C/raxmaan
Diini, Hiiraan Online
[email protected]
