Isniin, November, 20, 2017 (HOL) - Arday tiradoodu gaareysay 31 oo dhameysatay
waxbarashada heerka 1-aad ee Kulliyadaha Jaamacada Jobkey faraceeda Magaalada Beledweyne
ee gobolka Hiiraan ayaa xaflad qelin
jebin ah loogu qabtay halkaas, iyadoo shahaadooyina la gudoonsiiyey.
Xafladaasi oo si heer sare ah loo soo agaasimay ayaa
waxaa ka soo qeyb galay ka soo qeyb galay Gudoomiyaha gobolka Hiiraan ee
Maamulka Hirshabeelle Cali Jeyte, Xildhibaano ka tirsan Maamulka Hirshabeelle,
waalidiin, Maamulada Iskuulada iyo shirkadaha ku yaalla Magaalada Beledweyne
qaarkood iyo marti sharaf kale.
Dhamaan Mas’uuliyiintii ka hadlay xafladda ayaa waxay
bogaadiyeen Ardayda maanta Qalin-jabiyay, iyagoo ku guubaabiyay inay ka
Shaqeeyaan Horumarinta dalkooda.
Madaxa Akedemiyada Jaamacada Jobkey Maxamed Xasan Doob
ayaa sheegay in Jaamacaddu dabooshay baahiyo dhanka Waxbarashada sare ah oo
dalka ka jiray ayna sii wadi doonto dedaalkeeda arintaas ku saabsan isagoo u
hambalyeeyey ardayda qelin jebisay.
Gudoomiyaha gobolka Hiiraan ee Maamulka Hirshabeelle Cali
Jeyte oo khudbad ka jeedinay Munaasabadda wuxuu xusay in maamulkiisu ku dedaaki
doono in uu shaqo u abuurto dhallinyarada dhameysatay Jaamacada Jobkey faraca
Beledweyne, isagaoo hambalyo ka dib kula dardaarmay ardayda qelin jebisay inay
aqoontooda sii wataan si ay dalkooda dadkooda iyo naftoodaba wax ugu qabtaan.
Cali Jeyte ayaa sidoo kale kaga dhawaaqay munaasabaas
dhul ku yaalla magaalada Beledweyne oo maamulkiisu ugu deeqay Jaamacada Jobkey
si ay xarumo waxbarasho uga dhistaan, isagoo ku amaanay dedaalka ay ugu jirto
horumarinta Waxbarashada.
Ardayda xafladda qalin-jabinta ah loo qabtay ee
dhameystay Waxbarashada heerka 1aad ee Jaamacadda Jobkey faraceeda magaalada Beledweyne
ayaa gebagebadii xafladaas waxaa la gudoosniiyey shahaadooyinkooda, waxaana
wejiyadooda ka muuqatay farxad, maadaama ay muddo dheer ku taamayeen iney
heerkan soo gaaraan, dedaal badana ku bixiyeen.
Faracyada Jaamacada Jobkey ku kala leedahay gobolada
dalka qaarkood ayaa waxaa dhowaanahan ka dhacayey xaflado loo sameynayo arday
fara badan oo ka qelin jebisay ka dib markii ay soo dhameysteen muddo dhowr
sano ah oo ay waxbarasho adag ay ku soo jireen.
C/raxmaan
Diini, Hiiraan Online
[email protected]
