Isniin, November, 20, 2017 (HOL) –Waxaa
la soo gabagabeeyay kulamo wadatashi ah oo magaalada Jowhar uga socday
madaxweynaha dowlad gobolleedka Hirshabeelle iyo xidhibaannada maamulka,
waxaana kulamadaa loo arrinsanayay magacaabista gollaha wasiiradda Hirshabeelle
oo aan wali lagu dhawaaqin.
Waare ayaa qorsheynaya in uu soo dhiso golle wasiirro oo aysan
xildhibaanno ku jirin, taasoo wax xoogaa khilaaf ka dhax abuurtay
xildhibaannada iyo mas’uuliyiinta ugu sareysa maamulka Hirshabeelle.
Laakiin xildhibaan Maxamed Cadow oo ka tirsan baarlamaanka Hirshabeelle ayaa
warbaahinta u sheegay in la soo afjaray ismari-waagii labada dhinac laguna
heshiiyay sida uu hadalka u dhigay in gollaha wasiirradda cusub la soo xulo dibada baarlamaanka.
‘’Awoodu wey kala qeybsan tahay Annaga waxeynu nahay gollihii sharci
dajinta, waxaan nalaga-rabaa oo kaliya in aan la xisaabtanno gollaha fulinta oo
ah Wasiirrada, sidaa daraadeed madaxweynuhu waxaa uu soo dhisayaa golle
wasiirro oo aysan xildhibaanno ku jirin’ ayuu yiri Maxamed Cadow.
Laakiin xildhibaanku waxaa uu qiray in ay jiraan wali xildhibaanno sida uu
hadalka u dhigay tiro yar oo ka soo horjeeda qorshaha madaxweynaha ee lagu soo
dhisayo golle wasiirro ka baxsan baarlamaanka.
Golihii wasiiradda maamulkii kalsoonida lagala noqday ee Cali Cabdullaahi
Cosoble ayaa intooda badan ka yimid gollaha baarlamaanka Hirshabeelle, taa oo
keentay in xildhibaannadu ku dooddaan in lagu soo darro gollaha cusub ee la soo dhisayo.
C/raxmaan
Diini, Hiiraan Online
[email protected]
