Isniin, November, 20, 2017 (HOL) – Iyadoo
dhawaan baarlamaanka Soomaaliya uu sharci darro ku tilmaamay tallaabadii
dowladda federaalka Soomaaliya ay ugu gacan galisay dowladda Itoobiya
Cabdikariin Qalbi-Dhagax ayaa waxaa markii ugu horeysay arrintaa ka hadlay
qoyska Qalbi-Dhagax oo dalbaday in dib loo soo celiyo.
Maryan Cabdi Maxamed oo ka mid ah xaasaska Cabdikariin Sheekh Muuse
Qalbi-Dhagax ayaa sheegtay in markii ugu war danbeysay oo ay la xiriireen uu ku xirnaa magaalada Addis Ababa ee dalka Itoobiya.
‘’Maalin ayaan wada hadalnay oo aan Salaannay, waa uu na wareystay oo
Carruurta ayuu naga wareystay, waxaana uu inoo sheegay in uu xirran yahay oo
Xabsi Guri ku jiro magaalada Addis Ababa ayeey tiri Maryan.
Maryan ayaa sheegtay in jir dil weyn loo geystay Seygeeda markii laga soo qabtay
magaalada Gaalkacyo, hasse ahatee ma aysan sheegin lagu jir dilay xabsiga uu hadda
ku jiro ee magaalada Addis Ababa.
‘’Aad iyo Aad ayaan baarlamanka iyo umadda Soomaaliyeed uga mahad
celineynaa Garab istaaga ay inoo muujiyeen iyo sidda ay uga dhiidhiyeen sharci
darrada lagula kacay Qalbi-Dhagax ayeey hadalkeeda sii raacisay'' Maryan.
Waxaa ay ugu danbeyntii sheegtay in ay rajo badan ka qabto in C/kariin Qalbi
Dhagax lagu soo celin doono dalkiisa sida ay hadalka u dhigtay.
Gabar uu dhalay Qalbi Dhagax oo lagu magacaabo Fartuun ayaa iyana sheegtay
in ay si wanagsan ula socdaan wararka ku saabsan Aabaheed gaar ahaan go’aankii
uu qaatay baarlamaanka Soomaaliya oo ay ku tilmaamtay mid Wadaniyadeed.
‘’Annaga Eraygi noogu darnaa waxaa ay aheyd in Aabe iyo Ururkii uu ka
tirsanaa ee ONLF lagu sheego Aragagixiso halkii aan wax kale ka sugeyney iyo garaawshiyo
ayeey madaxweyne Farmaajo iyo Kheyre la soo shir tageen in ONLF yahay Urur
Argagixiso ayeey tiri Fartuun oo la hadashay VOA.
Laakiin Fartuun ayaa ku dhaliishay baarlamaanka Soomaaliya in aysan
cadeynin in laga daba-tagi doono Aabaheed Qalbi Dhagax dibna dalka loogu soo
celin doono.
Baarlamaanka Soomaaliya ayaa 152 cod ku ogolaaday in ay sharci darro aheyd
dhiibistii C/kariin Qalbi –Dhagax iyo go’aankii xukuumadda ee ahaa in Ururka
ONLF yahay Urur Argagixiso.
C/raxmaan
Diini, Hiiraan Online
[email protected]
