Isniin, November, 20,
2017 (HOL) – Rag hubeysan oo ku socday
gaari yar oo kuwa raaxada ayaa xalay weerar ku qaaday ciidamo ka tirsan
dowladda Soomaaliya oo ku sugnaa barkootarool xaafadda Xamar –Jadiid ee degmada
Wardhiigley.
Weerar ay maleeshiyadan hubeysan ku qaaday ciidamada ayaa
waxaa ka dhashay khasaare kala duwan, waxaana halkaa ku dhaawacmay Askari ka
tirsanaa ciidamada dowladda.
Kooxda weerarka geystay oo la rumeysan yahay in ay ka tirsanaayeen
Al-shabaab ayaa waxa ay ku baxsadeen gaarigii ay wateen, kaddib markii ay
rasaaseeyeen ciidankii ku sugnaa Koontaroolka gaadiidka lagu baaro ee Suuqa
Xamar Jadiid.
Muddooyinkan dambe waxaa aad u yaraa gaadiid ay saaran yihiin rag hubaysan
in magaalada gudaheeda ay ku rasaaseeyaan ciidanka dowladda iyo masuuliyiinta
intaba.
Wadooyinka magaalada Muqdisho intooda badan ayaa waxaa yaallo Baro-Kootarool
oo ay ku sugan yihiin ciidamada dowladda oo halkaa kala socda dhaqdhaqaaqa
magaalada iyo gadiidka isaga kala goosha.
C/raxmaan
Diini, Hiiraan Online
[email protected]