Axad, November, 19. 2017
(HOL) –Magaalada Jowhar waxaa saacadihii
ugu danbeeyay ka socday kulamo looga arinsanayo magacaabista xubnaha gollaha
wasiirrada maamul Hirshabeelle oo aan wali lagu dhawaaqin.
Madaxweyne Waare, ku-xigeenkiisa iyo guddoomiyaha baarlamaanka oo
wadatashiyada ugu ballaaran leh ayaa dhinaca kale waxaa barbar socda kulamo gaar gaar ah oo u dhaxeeya
xildhibaannada Hirshabeelle oo doonaya ay iska dhax arkaan gollaha cusub ee la
soo dhisayo.
Warar soo baxaya ayaa sheegaya in madaxweyne Waare dabacsan yahay
in uu wax ka badal ku sameeyo habkii loo soo dhisay gollihii wasiirro ee
madaxweynihii hore Cali Cabdullaahi Cosoble oo intooda badan ka yimid
baarlamaanka.
Sidoo kale madaxweyne Waare ayaa damacsan in gollaha wasiirrada
cusub noqdaan kuwo aad uga tiro yar kuwii ka horeeyay arrintaa oo la leeyahay
waxaa caqabad ku noqon doona saami-qeybsiga beellaha oo qolo walba doonayaan in
ay iska dhax arkaan gollaha cusub ee la soo dhisayo.
Xildhibaannada baarlamaanka ayaa intooda badan xusul duub adag ugu
jira sidii ay uga mid noqon lahaayeen gollaha wasiirrada la filayo in maalmaha
soo socda lagu dhawaaqo.
Sidoo kale waxaan meesha ka marneyn in xubnihii ku jiray gollihii
wasiirrada maamulkii kan kar horeeyay oo wali sii shaqeynaya mid walba oo ka
mid ah ku dadaalayo sidii uu u sii adkeysan lahaa xilka uu hadda hayo.
Waxaa Isha lagu wadda hayaa nooca gollaha wasiirrada cusub Hirshabeelle kaddib
markii ay soo dhamaadaan kulamada wadatashiga ah ee hadda socda.
C/raxmaan Diini, Hiiraan Online
[email protected]
