Axad, November, 19. 2017 (HOL) –Dowladda
Kenya ayaa sheegtay in ay dhici karaan weerarro dalkeeda uga yimaada dhinaca
Ururka Al-shabaab ee ka dagaalama gudaha dalka Soomaaliya, gaar ahaan
deegaannada dhaca Xuduuda labada dal ay wadaagaan.
Kenya ayaa sheegtay in ay jirto cabsi ku aadan weerarro ka dhaca magaalo
xeebeedyada dalka Kenya , halkaasi oo ay ku badan yihiin dadka ka yimaada
dalalka ka baxsan Kenya iyo sidoo kale Magaalada Mandera oo xuduudda la leh
Magaalada Beled-Xaawo ee Soomaaliya.
Magaalada Lamu ayaa la sheegaya in ay ka baxeen dadka aan Kenyaan aheyn
sababo la xariira ammaankooda.
Dowladda Kenya ayaa sidoo kale la sheegaya in ay heegan gelisay ciidanka
dowladda Kenya ee ku sugan Magaalo xeebeedyada dalka Kenya.
Sarkaal u hadlay dowladda Kenya ayaa sheegay in ay ka feejigan
yihiin Weeraro ka yimaada Al-Shabaab.
Waxaa uu sidoo kale sheegay in Amniga Magaalada Mandera la adkeeyay tan iyo
markii Al-Shabaab ay weerareen Magaalada Baledxaawo.
Al-Shabaab ayaa dalka Kenya weerarro ku qaadayay tan iyo sanadkii 2011 kii
Mar kasoo ciidanka dowladda Kenya ay gudaha u soo galeen Soomaaliya.
C/raxmaan Diini, Hiiraan Online
[email protected]