Sabti, November 18, 2017 (HOL)- Xisbiga WADDANI iyo
guddida doorashooyinka ayaa kulankii sadaxaad ee illaa shalay iyo maanta iskugu
yimaadeen ka soo saaray go’aammo ay isku raaceen oo ay ku heshiiyeen.
Gudoomiyaha gudida Doorashooyinka
C/qaadir Iimaan ayaa sheegay in wada hadal dheer oo laba cisho socday iskula
afgarteen laba qodob oo kala ah in tirintii degmadda Hargeysa iyo Gabiley
sideedii loo sii waddo iyo in Buugii ay soo bandhigeen ka heshiiyeen oo uu
noqday mid goob doorasho oo ku taalla Berbera laga xaday, sidaas uu ku soo
galay xisbiga WADANI.
“waxaanu iclaaminaynaa in
gudoomiyaha WADDANI iyo Anigu ka soo baxnay shir noo socday laba cisho, waxan
dadweynaha ku wargalinayna inuu shirkaasi noogu dhamaaday jawi wanaagsan oo si
fiican iskugu afgaranay qodobaddii cabashadda”ayuu yiri gudoomiyaha
doorashooyinka Iimaan.
Mar uu ka hadlayey labadda qodob
ee lagu heshiiyey waxa uu yidhi “Buugii degmadad Berbera ee codeynta waanu ka
shaafinay waana isla qaadanay waana ka heshiiinay waana nala qaateen, waxa kale
oo aanu ka heshiinay in tirintii gobolka Maroodi jeex iyo Gabiley ay sidoodii u
socdaan.”
Musharaxa xisbiga WADANI
C/raxmaan Maxamed C/laahi Cirro ayaa isna ka hadlay dhankiisa iyo waxay ku
heshiiyeen, waxaanu sheegay in dalab kale oo qoraala ahna usoo gudbiyeen in
goboladda kale ee aan hore ugu jirin markii hore cabashadda in iyagana dib loo
eego.
“waxaanu isla garanay in la
dhagaysto dalabyadii iyo codsiyadii xisbiga ee ku saabsan cabashada gud ahaan
gobolka Maroodi jeex gaar ahaan degmooyinka Hargeysa iyo Gabiley iyo dalab
goboladda kale ku saabsan oo aanu qoraal ahaan ugu soo gudbinay oo jawaab ka
sugi doonno, waxaanu isla garanay in aanu soo celino muraaqibiintii noo joogtay
komishanka Hargeysa iyo Gabiley.”
Mar uu gudoomiye CIrro ka
hadlayey buugii ay hore usoo bandhigeen ee codeynta waxa uu yidhi “Buugaasi
wuxuu ahaa mid soo galay gacanta xisbiga, waxaanay cadeeyeen in uu buugaasi ahaa
kii codeynta ee iyagu lahaayeen.”
Si kastaba ha ahaatee, waxa dib
loo bilaabay hubintii iyo tirintii codadka gobolka Maroodi jeex oo ay ka
hadhsan yihiin sanaaduuq kooban, waxaana la filayaa in ilaa caawa la soo
dhamaystiro, inkastoo codsiga cusub ee goboladda oodhan in dib loo eega ee ay
soo gudbiyeen Xisbiga WADANI jawaabtiisa laga sugayo komishanka Doorashooyinka.
Sidoo kale, Buugaagii uu xisbiga
WADANI soo bandhigay ee uu lahaa waa buug Foojari ah oo lagu codaynayey wuxuu
noqday buug laga xaday goob codeyntu ka socotay ee degmada Berbera, taas oo
markii horaba usii diwaangashanaa Komishanka,islamarkaana gudoomiyihii goobtii
laga xaday Buugaasi uu hore usoo wargaliyey Komishanka in buug ka mid ah kuwii
codeynta laga xaday.
Barkhad-ladiif M. Cumar,
Hiiraan Online
[email protected]
Hargeysa, Somaliland.
