Arbaco, November 15, 2017 (HOL)- xisbiga Mucaaradka ah ee
WADANI ayaa sheegay in meelo badan sharcigii u yaalay doorashada la jabiyey oo
qaarkood Muraaqibiintii xisbiga u joogay laga saaray, halka qaar kalena aanay
joogin markii la xisaabinayey.
Xisbiga WADANI ayaa sheegay inay
Komishanka doorashooyinka u gudbiyeen goobaha ay ka cabanayaan oo qaarkood
masuuliyiintoodda lagu xidhay, taas oo ay tuhmayaan inay khaladaad laga
sameeyey goobahaasi.
Sidoo kale, waxa ay sheegeen inay
kulan la yeesheen safiiradda reer Yurub oo goobjoogayaal ka noqday siday
doorashaddu u dhacaysay, waxaanay xuseen inay u gudbiyeen cabashadoooda,
haseyeeshee safiiradaasi kula taliyeen in si deg oo aan dhibaato abuurin u gudbiyeen
Komishanka doorashooyinka.
“Waxyaalo aan xeerkii raacsanayn
ama nidaamka ku haboonayn ayaa goobaha qaarkood ka dhacay, meelo markii la
tirinayey aanay wakiiladayadii joogin ayaa jiray, wax yaalo badan baa jira oo
khaladaad ah oo muraaqibiintayadii laga hor joogsaday, waxyaalahaasi aanu ka
cabanayno waxaanu gudbinaynaa Komishanka doorashooyinka, goobaha aanu ka
cabanayna waxa ka mid ah Gabiley”ayuu yidhi Cabdiqaadir Jirde guddoomiyaha Ku-meel-gaar ah ee Xisbiga WADANI.
Sidoo kale, waxa uu ka digay
dadka baraha bulshadda ku faafinaya xisbi hebel baa badiyey iyo xisbi hebel baa
cod batay, waxaanu ku adkeeyey in aan natiijo aan la hubin lagu baahiyey baraha
bulshadda oo khatar galin karta dadweynaha.
Sidoo kale, gudoomiyaha
Komishanka Doorashooyinka Cabdiqaadir Iimaan ayaa sheegay in markii cabasho
afka ah oo aan qoraal ahayn u sheegeen hogaanka xisbiga WADANI ay goobtii ay ka
cabanayeen oo ahayd gobolka Gabiley booqdeen,isla markaana markii ay darseen
aanay arag wax sharciga u dajisan doorashooyinka ka hor imanaya ama la jabiyey
oo ka dhacay, waxaanu sheegay in mar walba la eegayo xeerarka iyo anshaxa u
yaalla doorashooyinka
“Hogaanka xisbiga WADANI ayaa
cabasho afka ah oo aan ahayn qoraal
noogu sheegay in goobo ku yaalla gobolka Gabiley cabasho ka jirto, waxaanu
aniga iyo Afhayeenka guddida doorashooyinka tagnay goobihii laga cabanayey,
waxaana eegna in xeerkii iyo anshaxii doorashooyinka ee yaalay lagu xadgudbay,
meeshaasi kuma arag wax xeerka iyo anshaxa dhaafsiisan ama jabiyey oo ka
dhacay, meel kasta oo cabasho ka timaadana anaga toos loogahayaga ugu tagaynay
oo soo baadhaynaya waxa jira”ayuu yidhi guddoomiyaha guddida doorashooyinka
Iimaan oo ka hadlayey cabashadda xisbiga WADANi u soo gudbiyey
Sidoo kale, waxa uu sheegay in
aan la rumaysan Karin muraaqibiina codadka usoo gudbiyeen xisbiyadooda,
maadaama oo sanduuq kasta dib loo hubinayo oo ay dhici karto in xisaabta ay
haystaan is bedeli karto, waxaanu xisbiyada uga digay in aanay bulshadda
jahawareer ku ridin oo natiijo aan sax ahayn u gudbinin bulshadda. Waxa kale oo
uu sheegay in xarunta Komishanka ay la joogaan xisbi walba illaa toban qof oo
la hubinaya tirinta sanaaduuqda.
Barkhad-ladiif M. Cumar,
Hiiraan Online
[email protected]
Hargeysa, Somaliland.
