Axad,
May,28, 2017 (HOL)- Laba iyo Toban xildhibaan oo ka tirsan golaha deegaanka
degmadda Saylac ayaa kal fadhi aan caadi ahayn oo ay yeesheen ku doortay Maayar
cusub ka dib markii muddooyinkii u dambeeyey khilaaf hadheeyey xildhibanadaasi.
Xildhibaanaddan
ayaa maayar ku xigeenkii hore ee degmadda u doortay Maayar,isla markaana
sheegay in aqlabiyadii xildhibaanaddu isku raaceen in maayarkan cusub la
doorto, haseyeeshee waxa goobta joogin maayarkii la bedelayey.
Maayarka
cusub ee la doortay oo horena u ahaa maayar ku xigeen Sacad Daahir Cige oo ka
hadlay markii maayarnimadda loo doortay ka dib ayaa sheegay in xafladda
doorashaddu ka dhacday ay goob joog ka ahaayeen waaxyihii dawladda ee gobolka,
sida Badhasaabkii, xoghayihii dawladda hoose, taliye ku xigeenkii qaybta
gobolka Selel, taliyihi Badda ee gobolka.
Maayarkan
cusub ee ka soo dallacay maayar ku xigeenka Sacad Daahir Cige oo ka hadlaya
sida loo doortay waxa uu yidhi “ kalfadhigan aan caadiga ahayn waxa iskugu
yimid 12 xildhibaan , xaflada waxa ka soo qaybgalay badhasaabka gobolka,
xoghaya dawladda hoose, taliye ku xigeenka qaybta booliska, taliyaya ciidanka
badda, waxa halkaasi ku soo dhamaaday in 11 xildhbaan aniga ii doortaan
maayar.”
Mar
uu ka hadlayey sida uu arko in isagoo maayar ku xigeen hore u ahaa imika uu
noqdo maayar waxa uu yidhi “Runtii aniga aad baan u faraxsanahay inay maayar ii
doortaan, waa arrintii aan hore ugu soo shaqeeyey, waana hawl muhiim ah oo
ilaahay ka rajaynayo inay ii fududeeyo”
Dhinaca
kale, Maayarkii hore ee degmadda Saylac Iidle Saleebaan ayaan goobta la sheegay
in xilka lagaga qaaday joogin, iyadoo sharciyan tahay in marka maayar la
bedelay uu goob joog ahaa, sidoo kale waxa hore go’aammo looga soo saaray in
aan mudadda kala guurka ah wax isku bedel ah la samayn oo aan dawladda dhexe
aqbali Karin mooshinno ka dhan ah maayaradda dalka.
Barkhad-ladiif
M. Cumar, Hiiraan Online
[email protected]
Hargeysa,
Somaliland.