Sabti, May, 27, 2017 (HOL) - Dowladda Turkiga ayaa shaacisay
in 300 oo askari iyo tababarayaal u soo diri doonto Soomaaliya, gaar
ahaan magaalada Muqdisho bisha August oo sanadkan.
Safiirka dowladda Turkiga u fadhiya Soomaaliya Olgan Bekar oo waraysi
siiyay Jariirada Daily Sabah ayaa hadalka sheegay, isaga oo intaa ku daray in bisha September si rasmi ah loo furi
saldhiga militari ee Turkigu ka hergaliyay Muqdisho, islamarkaana la bilaabi
doono tababarada la siinayo ciidamadda Soomaalida ah.
Waxaa kaloo uu sheegay in Turkigu doonayo in caawiyo dowladda Soomaaliyeed
si ay dib ugu soo celiso awoodii dowladnimo iyo kala dambayntii iyo isxukunkii.
” 300 oo askari ayaa imaanaya bisha August oo isugu jira 100 tababare
iyo 200 askari oo ilaalin doono saldhiga milateri ee muqdisho oo haatan
gabo-gabo ku dhow” ayuu yiri , isaga oo intaa si raaciyay in ay tababari
doonaan saraakiisha ciidamada Soomaalida ee militari iyo sidoo kale ciidamada
gaarka ah.
Dowladda Turkiga waxay magaaladda muqdisho ka dhistay saldhigi ugu weyn ee
milateri oo meel ka baxsan wadankeeda ka dhisto, waxaana la filayaa in lagu
tababaro ilaa 3000 askari oo Soomaali ah , kuwasoo ka kala imaanay dhammaan
goboladda dalka.
C/raxmaan Diini, Hiiraan Online
[email protected]
