Ra’iisal wasaare Kheyre oo dhiiri-galin u sameeyay ciidamo loogu talagalay xasilinta caasimada Muqdisho
Isniin, May, 22, 2017 (HOL) – Ra’iisul
wasaaraha xukuumada Soomaaliya Xassan
Cali Kheyre ayaa booqasho dhiiri-galin ah ugu tagay ciidamada wadajirka ee
fulinta qorshaha xasilinta caasimada oo howlgalo lagu soo qab qabtay hub iyo
dareys ciidan ka sameeyay Muqdisho.
Ra’iisul wasaare Khayre oo hadal dhiirigelin ah u jeediyey ciidamada
howlgalka Muqdisho ayaa ku ammaanay doorkooda geesinimada leh oo ay u istaageen
inay shacabka Soomaaliyeed amnigooda iyo xasilloonidooda sugaan.
Ra’iisul
wasaaraha ayaa sheegay in maanta la joogo waqtigii xoojinta midnimada ummadda
iyo u istaagista difaaca shacabka.
Ciidanka wadajirka ah oo saakay aroortii 6da subaxnimo ka bilaabay howlgalkooda
degmada Wadajir, xaafada Xaawo Taako ee Siliga Ameerikaanka ayaa gacanta ku soo
dhigay 17 Qori iyo 3 bistooladood, tuutaha militariga, kan booliiska, calaqa
iyo xashiish.
Ciidanka ayaa sidoo kale isla maanta howlgal kaa la mid ah ka sameeyey degmada
Shingaani oo ay baaris ku sameeyeen goob Hubka lagu sameeyo, laguna gado.
Ciidanka ayaa la soo wareegay qalabkii sameynta hubka iyo kuwii hubka looga
baabi’inayey numberkooda. Waxaan goobtaas laga soo helay 2 Qori iyo 3
Bistooladood.
Ra’iisul Wasaaraha ayaa maqaayad ku taala Wardhiigley la fariistay
dhalinyaro halkaas joogtay oo uu ka wareystay xaaladooda. Waxaana halkaas ku
soo maray ardey iskuul ka soo baxday oo uu Ra’iisul Wasaarahu wareystay xaalada
waxbarashadooda.
C/raxmaan Diini, Hiiraan Online
[email protected]
