Xildhibaan Ilhaan Cumar oo qabatay kulan looga hadlay xanuunka Jadeecada iyo tirada oo sii kordhaysa Minnesota
Khamiis , May, 17, 2017 (HOL)–Xildhibaan
Ilhaan Cumar oo ka tirsan Golaha wakiilada ee Minnesota ayaa shalay galab ku qabatay xarunta Brian Coyle Center ee
xaafadda ay Soomaalidu ku badan tahay ee Cedar Riverside, Kulan looga hadlaayay tirada dadka Jadeecada ku dhacayso oo sii kordhaysa MN iyo sidii loo xakamayn lahaa,waxaa ka soo qeyb
galay masuulka ugu sareeya waaxda caafimaadka ee gobalka Minnesota Edward
P. Ehlnger iyo xubno kale oo tirsan aqalka sharci dajinta Minnesota.
Kulanka
ayaa looga warbaxiyey dadwaynaha cudurka jadeecada oo maalinba maalinta ka danbeysa ku sii
baahaya Soomaalida Minnesota heerka uu marayo iyo dagmooyinka uu u gudbay isagoo markii ku bilaabmay hal dagmo oo qura.
Tirada
guud ee caruurta laga helay cudurka jadeecada ayaa haatan waxa uu marayaa 63 oo
53 ka mid ahi ay Soomaali yihiin, sida ay xaqiijisay wasaaradda caafimaadka ee
gobalka.
Caruurta
Soomaaliyeed ayaa sababta looga helay cudurka jadeecada waxa ay wasaradda
caafimaadka ku sheegtay inay tahay talaal la’aanta.
Dr.
Edward Ehlinger, madaxa wasaaradda caafimaadka ee gobalka Minnesota oo la
hadlayay dadkii goobta isugu yimid, ayaa sheegay in cudurka jadeecadu uu yahay
cudur laga hortagi karo, islamarkaana uu keeni karo dhimasho, waxa uuna carabka
ku adkeeyay muhiimadda ay leedahay in kor loo soo qaado heerka talaalka
caruurta soomaaliyeed oo aad u hooseeya.
Xildhibaan
Ilhaan Cumar ayaa iyaduna HOL u sheegtay inay kulankaan uga dan lahayd in dadka
Soomaalida lagala hadlo sidii xanuunkaan faafaya loo soo afjari lahaa,ilmahana
lagu dhiirigaliyo inay talaalaan waalidiintu,waxayna ku dartay in loo baahan
yahay wacyi galin guud oo bulshadda loogu baaqo ka hortaga Jadeecada.
Xildhibaan
Ilhan Cumar ayaa sheegtay in golaha wakiilada ee gobolka Minnesota ay ka
shaqeynayaan sharci sadax qeybood ka kooban, oo ah qarash lagu bixiyo
wacyigelinta bulshada, in laga hortago dhamaan cudurada faafa iyo in waalidka
diida inuu ilmihiisa talaalo lagu qasbo inuu marka hore dhakhtar la kulmo.
Mas’uuliyiinta
Soomaalida iyo kuwa caafimaadka ee gobalka ayaa dhowrkii todobaad ee la soo
dhaafayba waxa ay wadeen dadaalo wacyigalineed oo bulshada loogu sheegayo in ay
ilmahooda jadeecada ka talaalaan.
Waalidiintii goobta ku sugnaa ayaa suaalo dhawra waydiiyay xeeldheerayshii caafimaad ee goobta ka hadlay iyagoo ka hadlay walwalkooda ku aadan talaalka MMR ee jadeecada loo qaato, kaas oo ay u diideen inuu keenayo xanuunka Autismka .
Siyad
Said Salah
Hiiraan
Online
[email protected]
Minneapolis
MN