Talaado, May, 16, 2017 (HOL) - Ciidamada dowladda Soomaaliya ee ku sugan
degmada Jalalaqsi ee gobolka Hiiraan ayaa xabsiga dhigay 10 oday dhaqameed oo ku eedeysan in ay ka
qeyb-galleen caleemo saarka shaqsi ka tirsan Al-shabaab.
Faarax Cali Gaafoow oo ah taliyaha ciidamada dowladda ee
degmada Jalalaqsi ayaa warbaahinta u sheegay in odayaashan la xir xiray degmada
Buurweyn ee gobolka Hiiraan uga qeyb-galleen caleemo saarka xubin ka tirsan Al-shabaab.
‘’Waa jirtaa arintaa shalay ayeey baxeen odayaashan, markii
ay baxeen ayaa laga war hellay waana la soo qabtay, sidaa ayaa xabsiga lagu
dhigay’’ ayuu yiri sarkaalka u hadlay ciidamada dowladda.
Waxaa uu sheegay in danbi kale oo odayaasha loo xiray aysan
jirin, laakiin laga war hellay in ay ka qeyb-galleen caleemo saarka shaqsi ka
tirsan Al-shabaab.
‘’Arinta odayaashan waxaa ka wada hadlaya maamulka degmada,
saraakiisha ciidamada dowladda iyo AMISOM go’aanka ay ka qaataan ayaa ka
warsugeynaa haddii aynu nahay laamaha amniga’’ ayuu yiri Faarax Cali Gaafoow.
Waayadii ugu danbeeyay ayaa deegaannada ay maamulaan
Al-shabaab waxaa markii ugu horeysay lagu arkay munaasabado calleemo saarka Salaadiin
iyo Ugaas beelloodyo ay yeellanayaan beellaha ku nool deegaannada ay maamulaan
taasoo ah arin waayadii hore aan ku badneyn dhulka ay ka taliyaan.
C/raxmaan Diini, Hiiraan Online
[email protected]
