Madaxweyne Farmaajo oo mar kale baarlamaanka ugu baaqay in xukuumada la ansixiyo
Isniin, Maarso, 27, 2017 (HOL) – Madaxweynaha dowladda
Soomaaliya Maxamed Cabdullaahi Farmaajo
ayaa mar kale ugu baaqay xildhibaannada baarlamaanka Soomaaliya in ay meel
mariyaa xukuumada cusub ee dhawaan uu soo dhisay ra’iisal wasaare Xassan Cali
Kheyre.
Madaxweynaha ayaa sheegay in uu taageeray gollaha wasiirada cusub oo sida uu hadalka u dhigay ah dad
aqoonyahanno ah oo ka soo bixin kara howsha loo idmaday, sidaa daraadeed
baarlamaankana uu ka filayo in ay codka kalsoonida siiyaan.
‘’Dalka waxaa uu ku jiraan xaalad adag, abaaro iyo dagaal
lagula jiro kooxaha xagjirka ah ee Al-shabaab sidaa daraadeed si howlaha - na hor
yaala loo dardar galiyo baarlamaanka waxaa ka codsanayaa in ay ansixiyaan
xukuumada’’ ayuu yiri madaxweyne Maxamed Cadullaahi Farmaajo.
Madaxweynaha ayaa dhinaca kale xildhibaannada ku wargaliyay
marka ay xukuumada shaqo gasho in ay la yimadaan isla xisaabtan dhab ah laakiin
inta ka horeysan aan wax is hortaag ah lagu sameyn gollaha wasiirada cusub.
Ugu danbeyntii baaqa
madaxweynaha ayaa imanaya xili dhawaan ay soo baxeen tiro ka badan 100
xildhibaan oo ugu baaqay ra’iisal wasaaraha in uu dib u eegis ku sameeyo
gollaha wasiirada cusub oo ay ku dhaliileen aan lagu saleyn saami-qeybsigii
beellaha Soomaaliyeed.
C/raxmaan Diini, Hiiraan Online
[email protected]
