Khamiis, Maarso,
16, 2017 (HOL) - Guddoomiyaha
Hay’adda Horumarinta Mudug (MDO) Prof. Cabdirisaaq Axmed Dalmar, Mas’uuliyiin
ka tirsan maamulka Galmudug ee gobolka Mudug, dhaqaatiir, xubno ka tirsan
Wasaaradda Caafimaadka xukuumada Somalia iyo masuuliyiin kale ayaa booqday
degaanka Bandiiradley, iyagoo xariga ka jaray dhismaha Isbitaal cusub oo
degaankaas laga hirgeliyey kaasoo si bilaash ah ugu adeegi doona bulshada
degaanka.
Isbitaalkan
oo dhismihiisu socday muddo badan, baahi badana ay u qabeen shacabka ku nool
Bandiiradley ayaa waxaa hirgelintiisa iska kaashaday NGO-yo Maxali ah,
qurbajoog iyo dadka degaanka qaarkood.
Prof.
Dalmar oo munaasabadaas hadal ka jeediyey isagoo ku hadlayey magaca heyaddaha
ka qeyb qaatay dhismaha Isbitaalkan ayaa sheegay inuu ku faraxsan yahay
furitaanka Isbitaalkan laga dhisay Bandiiradley oo uu xusay iney tahay degmo
qadiimi ah oo dad fara badan ay ku nool yihiin.
“Waxaan
u mahad celinayaa heyaddaha Himilo, Human Conern, qurba joogta ka soo
jeeda degaanka iyo intii kale ee ka qeyb qaatay dhismaha isbitaalkan quruxda
badan, sidoo kale. Waxaan Kaloo ku faraxsanahay inaan halkan ka caddeeyo
in heyadda Mudug Development Organization ay ku deeqday qalabka ugu
horeeya ee isbitaalku ku howlgalayo” ayuu yiri Dhaqtarka.
Dr.
Dalmar ayaa sharaxaad ka bixiyay qeybaha uu ka kooban yahay isbitaalka iyo
waxyaabaha ka dhiman ee loo baahan yahay in loo dhameystiro.
Waxaa uu
xusay in haatan la diyaariyay illaa afar qeybood oo kala ah qeybaha bukaan
socod eegtada oo wadata farmashiga daawada laga bixiyo, gargaarka deg deg ah,
Sheybaarka iyo qeybta hooyada iyo dhallaanka. Waxaana uu sidoo kala sheegay
inay dhiman yihiin qeybo ay ka mid yihiin Jiifka, nafaqada, cudurada faafa,
Masaajid, Ceel iyo waxyaabo kale oo u xusay in loo baahan yahay in lagu soo
kordhiyo.
Duqa
dagmada Gaalkacyo ee maamulka Galmudug Xirsi Yuusuf Barre oo munaasabada
furitaanka Isbitaalka ka hadlay ayaa sheegay in baahi weyn loo qabay
isbitaalkan, isagoo u mahad celiyay hay’adihii iyo shaqsiyaadkii iska kaashaday
hirgalintasa.
“Arritani
waxay muujinaysaa haddii bulshadu iskaashato iney wax badan qabsan karto,
isbitaalkana waa bilow, howl badan ayuu u baahan yahay, haddii la iskaashado
rabbina la talo saarto waxa dhiman lama waayi doono” ayuu yiri Xirsi Yuusuf
Barre oo shacabka Bandiiradley kula dardaarmay iney xanaaneeyaan Isbitalkan
cusub kana faa’ideystaan.
Waxaa sidoo kale munasabadaas ka
hadlay Agaasimaha Isbitaalka Gaalkacyo Maxamed Cabdi, isku duwayaasha
wasaaradda Caafimaadka dowlada Somallia iyo maamulka Galmudug oo balan-qaaday
iney kaalintooda ka qaadan doonaan howlaha shaqo ee isbitaalka iyo dhameystirka
wixii ka dhiman.
Intii ay
socotay munaasabadan waxaa si gaar loogu mahad celiyey Shiikh Axmed Shiikh
Cilmi oo ka mid ah waxgaradka Bandiiradley kaasoo ku deeqay dhulka uu ku
fadhiyo Isbitaalkan oo cabirkiisu gaarayo 100x100, waxaana loogu duceeyey inuu
ILAAHAY ka siiy ajir iyo xasanaad fara badan.
Waxgarad,
dhalinyaro iyo masuuliyiin ka tirsan maamulka degmada Bandiiradley oo iyana
munaasabadan ka hadlay ayaa u mahad celiyey dhamaanba intii ka qeyb qaadatay
dhismaha isbitaalkan, iyagoo xusay iney uga maarmi doonaan hooyooyinkii
foolanayey ee jidka ku dhiman jiray inta loo sii wado Gaalkacyo oo masaafo
badan u jirta, waxayna balan-qaadeen iney ka shaqeyn doonaan sidii loo
horumarin lahaa, iyadoo munaasabadan ku soo dhamaatay jawi aad u wanaagsan.
C/raxmaan Diini, Hiiraan Online
[email protected]
