Khamiis, Maarso, 16,
2017 (HOL) – Saraakiisha hay’adda nabad-sugida Qaranka ayaa warbaahinta u
sheegay in xalay ay ka hor tageen weerar xoogag ka tirsan Al-shabaab ay ku soo qaadeen
barkoontarool oo ay ciidamada booliiska ku lahaayeen xaafadda Suuqa Xoolaha ee degmada
Huriwaa halkaasoo uu ka dhacay iska horimaad kooban.
Ciidamada booliiska ah ee la weeraray oo markii danbe gurmad
ka helay ciidamada nabad-sugida ayaa halkaa ku dilay xubno ka tirsanaa kooxihii
weerarka soo qaaday waxaana la sheegay in shaqsiyaadka la dilay uu ka mid ahaa
horjooge ka tirsanaa Al-shabaab.
Afhayeenka maamulka gobolka Banaadir C/fitaax Cumar Xalane
oo warbaahinta la hadlay ayaa sheegay in horjoogaha la dilay lagu magacaabi
jiray Amiir Jacfar kaa oo horkacayay weerarka xalay lagu soo qaaday xaafadda
Suuqa Xoolaha.
Waxaa uu sheegay in ciidamada ay gacanta ku dhigeen qori AK47 iyo
qoriga Baasuukaha oo uu watay ninka la dilay, waxaana xaalada saaka ay
tahay mid degan.
Ugu danbeyntii , weerarkan ayaa noqonaya kii ugu horeeyay ee
Al-shabaab ay soo qaadeen tan iyo wixii ka danbeeyay isbadalka cusub ee ku
dhacay hogaanka dalka marka laga soo tago dilalka iyo qaraxyada waayadii ugu
danbeeyay joogtada ka noqday magaalada Muqdisho.
C/raxmaan Diini, Hiiraan Online
[email protected]
