Talaado, Maarso, 14. 2017 (HOL) - Tababar maalin socday oo ku saabsan barashada
cudurada ka dhasha abaaraha sida Daacuunka (Cholera) iyo nafaqo darada
(Mal-nutrition) ayaa shalay lagu qabtay magaalada Muqdisho, waxaana ka
faa’iideystay boqolaal ka mid ah ardayda wax barata kuliyadaha Caafimaadka ee
Jaamacadaha dalka.
Waxaa soo qaban-qaabiyey tababarkan aqoon kororsiga ahaa
Ururka dhaqaatiirta ardayda Soomaaliyeed (Somali Medical Students Association)
SOMSA, iyadoo casharo ku saabsan cuduradan ay halkaas ka bixiyeen Dr. Maxamed
C/llaahi Yuusuf oo ka mid ah dhaqaatiirta Soomaaliyeed iyo Drs. Luul Maxamuud
Maxamed oo ah hormuudka kuliyadda Caafimaadka ee Jaamacadda Jasiira, kana mid
ah maamulka Isbitaalka Banaadir.
Dhaqaatiirtan ayaa si faahfaahsan uga waramay sababaha
keena cudurada daacuunka iyo nafaqo darida, dhibaatooyinka ay u geystaan dadka
ay haleelaan iyo hababka looga hortago, loona daweeyo, waxayna xuseen in
labadan cudur ay yihiin kuwo dilaa ah oo loo baahan yahay in bulshada si weyn
looga wacyi geliyo.
Labada dhaqtar ayaa sidoo kale si saraaxad leh uga
jawaabay su’aalo ku saabsanaa cudurada laga hadlayey oo ay soo jeediyeen qaar
ka mid ah ardayda Jaamacadaha ee loo qabtay tababarkan.
Hormuudka Kuliyadda Caafimadka ee Jaamacadda Muqdisho
Maxamed Xuseen Booyaaye oo hadalo kooban ka jeediyey halkaas ayaa u sheegay
ardayda ka faa’ideystaan tababarada noocan ah oo uu sheegay iney kor u
qaadeyaan garaadkooda aqooneed.
Prof. Cismaan Max’uud Dufle oo ka tirsan xubnaha aqalka
sare ee baarlamanka Somalia, ahna hormuudka qeybta waxbarashada sare (Master)
ee Jaamacada Banaadir oo isna halkaas ka hadlay ayaa u mahad celiyey ururka
SOMSA ee soo qaban-qaabiyey aqoon kororsigan, macalimiintii bixiyey iyo ardayda
ka faaideystay intaba.
“Tabababrkan la xiriiray Cudurada daacuunka iyo nafaqo
darada waa mid aad u muhiim ah oo loo baahnaa maxaa yeelay wuxuu ku soo aaday
xili cuduradan ay shacabka Soomaaliyeed ku hayaan dhibaatooyin badan maadaama
ay dalkeena ka jiraan abaaro meel walba saameeyey, kumanaan qof ayaa u dhintay
qaar kalena wey la ildaran yihiin” ayuu yiri Prof. Dufle oo ardayda tababarkan
loo qabtay ugu baaqay in waxyaabaha ay barteen ay uga faa’iideeyaan bulshada.
Guddoomiyaha ururka Ururka dhaqaatiirta ardayda
Soomaaliyeed C/llaahi Maxamuud Tuuryare oo gebagebadii munaasabadaas ka hadlay
ayaa u mahad celiyey ardayda ka faa’iideystay tababarkan iyo martida kala soo
qeyb gashay intaba, wuxuuna xusay in ururka SOMSA uu mar walba qabto tababarada
noocan ah si kor loogu qaado aqoonta ardayda Soomaaliyeed ee ku howlan
barashada Caafimaadka.
Ugu dambeyn masuuliyiinta goob jooga ka aheyd tababarkan
ayaa shahaadooyin uu bixiyey ururka SOMSA waxay guddoonsiiyeen ardayda ka
faaideysatay tababarkan waxayna munaasabadaas ku dhamaatay jawi ad u
wanaagsan.
C/raxmaan Diini, Hiiraan Online
[email protected]