Isniin, Maarso, 13, 2017 (HOL) – Madaxweynaha maamulka Khaatumo Prof. Cali Khaliif Galaydh
ayaa tegey magaalada Buuhoodle iyada oo uu weli taagan yahay ismaandhaaf ku
wajahan imaashihiisa.
Madaxweyne Galaydh oo ay weheliyaan
qaar ka mid ah golayaashiisa ayaa xili la sheegay in uu ka horeeyey salaadii
subax ee saaka, iyadoo aan la ogayn safarkiisan oo ahaa mid aan la ogayn.
Banaan bax ayaa ka bilaabmay wadada
uu ku yaalo Hotelka uu ku degey kaas oo ku yaala faras magaalaha Buuhoodle,
kaas oo ay ka dhasheen rabshado kadib markii ay banaanbaxayaasha rasaas ku kala
kexeeyeen ilaalada Hotelka sida uu noo sheegay Weriye Cali Cismaan "Cali
Dhegjar" oo halkaasi goobjoog ahaa.
"Waxaa isugu yimi dad diidan
imaanshaha madaxweynaha Khaatumo afaafka Hotel Cabdi-Gurey, waxay gubeen
Taayiro waxaanay ku qaylinayeen hadalo ku lid ah, xaaladuna way ahayd mid caadi
ah ka hor itaanay soo bixin ciidan illaalinayey hotelka oo rasaas
adeegsadey" ayuu yiri Cali Dhegjar. isgsagoo intaas raaciyey in uu arkay
qof dhaawac ah dadkuna sheegayeen dad kale oo wax soo gaadheen.
Xaalada Hotelka uu degan yahay
madaxweyne Cali Khaliif ayaa hada degan, waxaase kacsan magaalada oo laga cabsi
qabo inay rabshado ka dhashaan sida ay sheegayaan dad badan oo Hiiraan xidhiidh
kula samaysay sidii xogdheer looga heli lahaa.
Madaxweyne Galaydh iyo weftigiisa
ayaan wax hadal ahi ka soo bixin, waxaana la sheegaya in Galaydh uu diyaarad
rabo inuu ka raaco Buuhoodle oo horey loogu diidey in uu ka dhoofo, taas oo
gayeysiisey inuu magaalada Hargeysa diyaar uga raaco Jabuuti, halka uu haatan
doonayo wadanka Imaaradka Carabta.
Safarka Madaxweyne Galayr ayaa la
sheegayaa inuu salka ku hayo gudi maamulka Khaatumo lahaa oo loogu yeedhi G11
kuwaas oo ka soo horjeestey wadahadalada uu la bilaabay maamulka Somaliland,
waxana la sheegayaa in ay qorshayaal kale u soo bandhigi doonaan si uu uga
laabto qorshihiisa wadahadal.
Seynab Cabdi Warsame
[email protected]
Laascaanood G. Sool
