Hiiraan Online

Isniin, Maarso, 13, 2017 (HOL) –Waxaa xalay magaaladda Minneapolis ee gobolka Minnsesota lagu qabtay dood-cilmiyeedka Fagaaraha, kaas oo lagu gorfeeyay caqabadaha horyaal iyo fursada ay heysato dowladda cusub ee Soomaaliya, Fagaaraha 24 aad waxaana marti ku ahaa aqoonyahanno Somaaliyeed oo khibrad u leh dowlanimada iyo siyaasadda.

Doodaan oo uu daadihinaayay Faarax Maxmaed Cali ( Farah Blue) oo ah wariye ka tirsan HOL, ayaa aheed mid looga doodaayay caqabadaha ka hor imaan kara iyo fursadaha dowladda cusub ee Soomaaliya hogaaminaysa 4 sano ee soo socota.

Aqoonyahanadan waxaa ka mid ahaa Ambassador Abuukar Arman oo ahaa u qeybsanihii arrimaha Mareykanka ee Madaxweyne Sheekh Shariif, hadana ah qoraa ka faalooda arrimaha Islaamka, Siyaasadda iyo arrimaha dibadda, Maxamuud Cali Geeldoon oo ka mid ah aqoonyanahada darsa siyaasadda Soomaaliya iyo Abuukaate C/waaxid Qalline oo hore ula soo shaqeeyay dowladda Soomaaliya, ahna qareen ku nool gobolka Minnesota.

“Madaxweyne Maxamed C/llaahi Farmaajo waa nin saaxiibkey ah waana u hambalyeeyay markii la doortay, waxaan kula talinayaa inuu ka fiirsado shaqsiyaadka loo dhiibayo dhowr wasaaradood oo muhiim ah, oo ay ka mid yihiin arrimaha dibada, xiriirka caalamiga ah iyo Kheyraadka” Ayuu yiri Abuukar Armaan oo intaas ku sii daray “Madaxweynuhu markii uu Ra’isul Wasaaraha Cusub magacaabay waxaan u soo jeediyay inuu ka noqdo, waayo turxaan bixin laguma sameyn isaga iyo shirkadda Soma Oil and Gas ee uu ka tirsanaa”

Arman wuxuu sheegay in fursadaha muuqda ee dowladda  Farmaajo ay ugu muhiimsantahay kalsoonida shacabka iyo hanka loo qabo inay waxqabad buuxa la yimaadaan iyo inay jirto fursad ay dib u heshiisiin ku billaabi karaan.

“Caqabadaha ugu waaweyn waxaan u arkaa Federalka,  faragalinta shisheeye iyo maamul goboleedyada” Ayuu sii raaciyay Arman. 

C/waaxid Qalinle ayaa isna sheegay in Musuq-maasuqa, dib u habeynta garsoorka, dasuurka, awood qeybsiga dowladnimo, wada shaqeynta labada aqal iyo dowlad goboleedyadu ay u baahan yihiin wakhti iyo maskax badan. 

“Waxaan u baahanahay maxkamado, ciidan iyo hey’ado dowladeed oo hirgaliya sharciga, awoodna u isticmaala shaqsiyaadka lagu helo inay ku lug leeyihiin wax is daba marinta iyo tuuganimada” ayuu yiri Abuukaate C/waaxiid. 

Wuxuu sheegay C/waaxid in haddii is qab-qabsiga siyaasadda uu soo noqdo ay adkaan doonto jiheynta dalka, ayna caqabado badan isku gadaami doonaan fursadaha ay dowladdu ka faa’iideysan karto.

Maxamuud Geeldoon ayaa sheegay in haddii la soo celiyo awooddii dowladda dhexe in waxyaabaha kale ay sahlanaan doonaan.

“Haddii aan la soo celin awooddi dowladda dhexe, ma jirto wax qiimo ah ee uu yaalanayo dastuurka dalka, waayo waxaa wiiqaya dowlad goboleedyada” Ayuu yiri Geeldoon.

“Haddii dowladda ay awood u yeesho shacabka, waxaa la heli doonaa xoog u isku duban ee aan la loodin, waxaana kula talinayaa inay ka faa’iideystaan jaceylka ay shacabku u hayaan iyo billowga is dhexgalka dadka Soomaaliyeed oo ay tusaale noogu filan tahay magaalada Gaalkacyo oo jidadkeedii iyo shacabkeedii isku furmeen” ayuu sheegay mudane Geeldoon. 

Sadexdan aqoonyahan ayaa isku raacay in fursadda ugu weyn ay tahay kalsoonida shacabka, waxayna ku celceliyeen inay wax ka bartaan khaladaadkii dowladihii hore u keeni jiray fashilka iyo guul darrada. 

Dadweynihii ka soo qeybgalay dooda 24-aad ee Fagaaraha ayaa iyaguna su’aalahooda iyo aragtidooda ku cabbiray dhowr arrimood oo ay ka mid ahaayeen heshiisyada caalamka lala galo, Alshabaab, Amisom, musuq-maasuqa, xiriirka dibadda, abaaraha, Qaadka, awoodaha dowlad goboleedyada iyo dhallinyarada. 

Doodan oo maqal iyo muuqaal ah kala soco HOL maalmaha soo socda.

Siyaad Siciid Saalax, Hiiraan Online

[email protected]