Sabti, Maarso, 11, 2017 (HOL) - Wararka naga soo gaaraya magaalada Jowhar ee
xarunta u ah maamul gobolleedka Hirshabeelle ayaa sheegaya in ay kulan maanta
ay halkaa ku yeesheen xildhibaannada baarlamaanka Hirshabeelle lagu kala tagay
kadib markii leysku khilaafay ansixita xubnihii gollaha wasiirada uu dhawaan
magacaabay madaxweyne Cali Cabdullaahi Cosoble.
Inkastoo wararka naga soo gaaraya magaalada Jowhar sheegayaan in cod gacan
taag ah lagu ansixiyay gollaha wasiirada, hadana dhinaca kale xildhibaannada ka
soo horjeeda arintan ayaa is hortaag ku sameeyay in la tiriyo codadka
xildhibaannada kuwaa oo buuq iyo jahwareer ka dhax abuuray fadhiga, iyaga oo
markii danbe dibada uga baxay, islamarkaana sheegay in aysan aqbali doonin
natiijada ka soo baxda kulanka maanta oo ajandihiisu ahaa ansixinta gollaha
wasiirada.
“ Balanta waxaa ay aheyd in Madaxweyne Cali Cabdulaahi Cosoble, uu hor
yimaado Baarlamaanka, ka bacdina su’aalo laga weydiiyo 54-ta wasiir ee uu soo magacaabay,
kadibna mooshinka maalin kale loo qabto, balse Madaxweynaha oo aan Baarlamaanka
imaan, ayuu Guddoomiyaha Baarlamaanka uu soo hormariyay dooda mooshinka,
taasina waa sababta dhalisay khilaafka maanta ee Baarlamaanka”, sidaasi waxaa
Hiiraan Oinline u sheegay Xildhibaan Cabdulwali Sheekh.
Xildhibaannada maamulka Hirshabeelle ayaa horay qaarkood u sheegay in aysan
aqbali doonin xubnaha golaha wasiirada uu soo dhisay madaxweyne Cali
Cabdullaahi Cosoble, waana tan keentay in uu jahwareer galo habsami u socodkii
howlaha maamulka.
Wixii warar ah ee ka soo kordha waan idin soo gudbin doonnaa..
C/raxmaan Diini, Hiiraan Online
[email protected]