Maamulka gobolka Bakool oo beeniyay in ciidamo gurmad ah loo diray Mukhtaar Roobow
Jimco, June, 30, 2017 (HOL) – Guddoomiyaha gobolka Bakool Maxamed Cabdi Tool oo la hadlayay VOA ayaa
beeniyay in ciidamo ka baxay gobolka Bakool loo diray deegaanka uu ku nool
yahay Mukhtaar Roobow si ay u caawiyaan.
Sidoo kale guddoomiyaha ayaa beeniyay in Mukhtaar Roobow
ku sugan yahay deegaan lagu magacaabo Abal oo ka tirsan gobolka Bakool, isaga
oo sheegay in deegaankaa ay gacanta ku hayaan xoogagga Al-shabaab.
‘’Warbaahinta waxaan ka maqlnay in maamulka Koonfur
galbeed ciidamo gurmad ah u diray Mukhtaar Roobow oo ay weerar ku hayaan
Al-shabaab, waxaan kuu xaqiijinayaa in aysan jirin ciidamo ka baxay gobolka
Bakool oo gacan siinaya Abuu-Mansuur, laakiin waa ay dhici kartaa in ay jiraan ciidamo kale oo ka baxay deegaannada
kale ee maamulka Koonfur galbeed uu ka arimiyo’’ ayuu yiri guddoomiyaha gobolka
Bakool.
Laakiin dhinaca kale waxaa uu sheegay in ay ka war
hayaan xiisad ka jirta deegaanka la sheegay in ay ku nool yahay Mukhtaar
Roobow, balse waxaa uu ka gaabsaday in uu ka hadlo mowqifkooda la xiriira
Abuu-Mansuur iyo haddii ay gacan militari siinayaan.
‘’Anaga markii horeba xiriir ma laheyn Mukhtaar
Roobow, deegaanka ayaan wada degannahay
wax colaad ah oo dhinaca kale loo dhaxeysayna ma jirin tan iyo markii ka go’ay
garabka Al-shabaab’’ ayuu yiri Maxamed Cabdi Tool.
Guddoomiyaha oo la weydiiyay su’aal aheyd sida ay ka
yeelayaan haddii uu Mukhtaar Roobow ka dalbado taageero militari ayuu sheegay in
arintaasi tahay mid u taala maamulka sare ee Koonfur galbeed.
C/raxmaan Diini, Hiiraan Online
[email protected]