Sarkaal Kenyaan ah oo soo jeediyay in la duqeeyo qeybaha Al-shabaab kaga sugan yihiin Kenya
Jimco, June, 30, 2017 (HOL) – Sarkaal sare oo amniga u qaabilsan Dawlada
Kenya ayaa soo jeediyay in diyaarado lagu duqeeyo deegaano ka mid ah dalka
Kenya, halkaasoo la sheegayo in kooxda Al-Shabaab ay ku dhuumaaleysanayaan oo
ay weerarada gudaha Kenya ay ka fuliyaan ka soo abaabulaan.
Sarkaalkan oo lagu magacaabo Nelson Marwa oo ah madaxa isku xirka amniga ee
gobolka xeebta dalka Kenya, ayaa shir jaraa’id oo uu ku qabtay magaalada Mombaasa,
ayaa soo jeediyay in diyaaradaha
dagaalka ee Kenya loo diro keyta Boni ee ka tirsan deegaanka Lamu, halkaasoo ku
dhow soohdinta Soomaaliya.
“Waxaan u soo jeedinayaa dawlada inay duqeyso, oo gebi ahaanba dhulka dhigto
kaynta Boni Forest, si looga sifeeyo maleeshiyaadka Al-Shabaab.” ayuu yiri
Nelson Marwa.
Marwa ayaa dadweynaha u soo jeediyay inay ka fogaadaan keyntaasi, iyadoo
dadka xoolo dhaqatada ahna loo sheegay inay ka guuraan iyaga xoolahooda kayntan
si ciidamada ay uga fuliyaan hawsha duqeynta ah.
Sarkaalka ayaa ku eedeeyay ciidamada ammaanka in ay ka baqayaan gelitaanka
kaynta Boni oo ah dhul dhir iyo biyo leh, halkaasoo ka mid ah meelaha sida
aadka looga baqo.
“Ma garanayo sababta ay askarta uga cabsanayaan Boni. Boni ma ahan
Soomaaliya ee waa gudaha Kenya.” ayuu yiri sarkaalkan ammaanka u qaabilsan
gobolka Xeebta dalka Kenya.
Sarkaalkan ayaa sheegay in isaga laftiisa uu diyaar u
yahay in uu ku dhinto hawlgallada lagu badbaadinayo dadka shacabka ah oo uu
sheegay in maalin kasta maleeshiyaadka Al-Shabaab ay ku dilaan weerarada ay ka
geystaan gudaha dalka Kenya.
Illaa hadda ma cadda in dawlada Kenya ay fulin doonto soo jeedinta
sarkaalkan amni ee ku baaqay in la duqeeyo Kaymaha Boni oo ay ku nool yihiin
dad kumanaan xoolo dhaqato ah, ahna deegaanada ay Muslimiinta deggan yihiin ee
dalka Kenya.
C/raxmaan Diini, Hiiraan Online
[email protected]
