Khamiis, June, 29, 2017 (HOL)- Axmed Cali oo loo yaqaano Axmed Knowmadic oo
dhalasho ahaan Soomaali ah ayaa loo magacaabay suugaan yahanka magaalada
Edmonton ee dalka Canada ilaa sanadka 2019.
Ali, 33, sano jir ah ayaa dalka Canada tagay sanadkii 1992, isagoona
ah qof ku wanaagsan tirinta gabeyada.
“Edmonton waa meeshii igu horeysay oo aan bartay, sidaa awgeed qalbigeyga
ayay ku taalaa,” ayuu yiri Axmed Cali.
Shaqada la doonayo ayaa ah in uu u fasiro ereyada suugaanta marka ay
shireyaan gollaha magaalada Edmonton, isla markaana uu qeyb ka qaato
horumarinta suugaanta magaaladaas.
Axmed Knowmadic ayaa waxaa soo xuley suugaan yahan hore iyo qaar ka mid ah
xubnaha bulshada Soomaaliyeed ee halkaas ku dhaqan kaddib markii ay arkeen sidda
Axmed ugu wanaagsan yahay tirinta gabeyada iyo suugaanta kale.
Golaha suugaanta magaalada Edmonton ayaana ugu dambeyntii Axmed u
doortay jagadan oo ah tii ugu horeysay oo qof Soomaali ah loo caleemo saaro.
“Wuxuu akhriyay gabey qosol iyo reyn reyn ku sameeyay guddiga xulidda loo
xil saaray,” ayuu sheegay afhayeenka Jenna Turner.
“Hanaankiisa u gaarka ah oo Gabey tirinta waxaa u maleynayaa in uu awoodi
doono in wax badan nooga sheegi doono magaalada.”
Axmed Cali oo ku magac dheer Axmed Knowmadic ayaa noqoneya Suugaanyahankii
todobaad oo xilkan qabto, isago xilka kala wareeji doono Pierrette
Requier, kaas oo ah nin Luuqado badan ku hadla, masraxyada soo bandhiga islamarkaana
sheekooyinka qora.
C/raxmaan Diini, Hiiraan Online
[email protected]
