Arbaco, June, 28, 2017 (HOL) – Wararka ka imanaya gobolka Bakool ayaa
sheegaya in xoogag ka tirsan Al-shabaab qorsheynayaan weerar ka dhan ah Mukhtaar
Rooboow Cali Abuu-Mansuur oo dhawaan dowladda Mareykanka ka saartay Liiska
argagixisada.
Guddoomiyaha degmada Xudur Maxamed Macalin ayaa sheegay in ay ka war hayaan
wararka ku saabsan dhaqdhaqaaqa Al-shabaab, hasse ahaatee waxaa uu intaa ku
darray in ilaa iyo hadda uusan jirin weerar lagu qaaday deegaanka uu ku nool
yahay Mukhtaar Rooboow.
‘’Wararkaas waan maqalnay, laakiin ilaa iyo hadda ma dhicin wax weerar ah,
Annagana wax xiriir ah oo aan la leenahay Mukhtaar Rooboow ma jiro’’ ayuu yiri
guddoomiyaha degmada Xudur.
Dhinaca kale guddoomiyaha ayaa ka gaabsaday su’aal aheyd waxa ay ka
yeelayaan haddii xoogagga Al-shabaab weeraraan deegaanka uu ku nool yahay
Mukhtaar Rooboow oo ka tirsan degmada Xudur, isaga oo sheegay in su’aashaa uu
ka jawaabi doono marka uu falku dhaco.
Laga soo bilaabo sanadkii 2012ka wax war ah lagama maqlay Abuu-Mansuur,
kaddib markii ay isku dhaceen hogaamiyihii hore ee Al-shabaab Axmed Cabdi
Godane , laakiin ku magac-dheeraa Abuu –Zubeyr.
C/raxmaan Diini, Hiiraan Online
[email protected]
