Jimco, July, 21, 2017 (HOL) –Mukhtaar Rooboow Cali
Abuu-Mansuur ayaa la sheegay in uu iska diiday codsi uga yimid xoogagga
Al-shabaab oo ka dalbaday in marka kale uu ku soo biiro ururka, kaddib markii
dhawaan dowladda Mareykanka ka qaadeen xayiraadii saarneyd.
Guddoomiyaha degmada Xuddur
Maxamed Macallin Axmed oo la hadlay Idaacada VOA ayaa sheegay in
Al-shabaab ay ka codsadeen Mukhtaar Rooboow in uu dib ugu noqdo kooxda, hasse ahaatee
uu arintaa ka soo horjeestay.
Al-shabaab ayaa la sheegay in ay ku hareereysan yihiin
deegaanka uu ku sugan yahay Mukhtaar Rooboow oo ku dhaw degmada Xuddur ee
gobolka Bakool.
‘’Waxaa nagu maqaalo ah in Al-shabaab ay ku cadaadinayaan Mukhtaar
Rooboow in uu mar kale ku soo laabto ururka isagana uu ka diiday, arintaas ayaa
shaki badan nagu heysa, waxaana deegaanka uu ku sugan yahay ku hareereysan
xoogag ka tirsan Al-shabaab’’ ayuu yiri guddoomiyaha degmada Xuddur.
Al-shabaab ayuu sheegay in ay shaki badan ka qabaan Mukhtaar
Rooboow in uu ku biiro dhinacyo kale taasoo caqabad ku noqon karta joogitaankooda
deegaanka.
‘’Hadalkii madaxweynaha
Koonfur galbeed iyo dowladda Soomaaliya arimahaas ayeey ka shakisan yihiin,
sidaa daraadeed cadaadis ayeey ku hayaan ah in uu mar kale ku soo biiro’’ ayuu
yiri intaa raaciyay Maxamed Macallin.
Guddoomiyaha aya sheegay in ilaa iyo hadda uusan jirin
xiriir toos ah oo dhaxmaray isaga iyo Mukhtaar Rooboow, laakiin mar walba ay ku
shaqeyn doonaan go’aanka maamulka Koonfur galbeed uu ka qaato arintaas.
Madaxweynaha maamulka Koonfur galbeed Shariif Xassan Sheekh
Aadan ayaa horay u sheegay in ay soo dhaweynayaan go’aanka Mareykanka ee
xayiraada looga qaaday Mukhtaar Rooboow.
C/raxmaan Diini, Hiiraan Online
[email protected]
