Khamiis, July, 20, 2017 (HOL) - Ciidamo ka tirsan militariga dowladda
Soomaaliya ayaa la wareegay gacan ku heynta saldhiga booliiska degmada
Beledweyne kaddib iska horimaad kooban oo barqanimadii maanta dhacay.
Ciidamadan ayaa ka hor inta aysan gudaha u galin saldhiga
waxaa ay rasaas is-weydaarsadeed ciidamo ka tirsanaa booliiska dowladda
Soomaaliya hasse ahaatee markii danbe isaga baxay saldhiga mana jirto cid wax
ku noqotay rasaasta labada dhinac ay is-weydaarsadeen.
Aritan ayaa ka
danbeysay khilaaf labadii maalmood ee la soo dhaafay ka taagnaa hogaanka booliiska degmada Beledweyne oo ay
isku hayaan dowladda federaalka iyo maamulka Hirshabeelle oo la sheegay in mid
walba dhinaciisa uu soo magacaabay taliye cusub.
Guddoomiyaha maamulka gobolka Hiiraan Cumar Aadan Ibraahim
Baadiyoow oo warbaahinta la hadlay ayaa beeniyay in ay saldhiga kala wareegeen
ciidamo booliis ah oo ka tirsan dowladda Soomaaliya.
‘’Saldhiga waxaa la wareegay ciidamo booliis iyo militari isku dhaf ah
kadib markii shaqsi sheegtay in ay soo magacaawday dowladda dhexe uu la gallay maleeshiyaad ay isku heyb yihiin sidaa daraadeed ma jiro iska horimaad
dhaxmaray ciidamada militariga iyo ciidamo ka tirsan booliiska dowladda
Soomaaliya oo aan ognahay’’ ayuu yiri guddoomiyaha maamulka gobolka Hiiraan.
Marka laga soo tago hadalka guddoomiyaha wali ma jiro wax war ah oo dhinacooda ka soo baxay
saraakiisha ciidamada militariga iyo booliiska ee ku sugan degmada Beledweyne.
Sidoo kale nooma suurtalin in aan helno taliyaha la sheegay
ay soo magacaawday dowladda dhexe ee maanta lagala wareegay saldhiga.
Arimahan oo dhan ayaa imanaya xili magaalada Beledweyne uu
ku sugan yahay madaxweynaha maamulka Hirshabeelle Cali C/llaahi Cosbole oo aan
wali dhinaciisa ka hadal dhacdadan.
C/raxmaan Diini, Hiiraan Online
[email protected]