Soomaalida dagan Boston oo xustay 57 sano guuradii ka soo wareegtay xoriyadda Soomaaliya
Axad,
July, 02, 2017 (HOL) - Munaasabad si heer saro
ah loo soo agaasimay oo loogu dabaal-dagaayay Sannad guuradii 57-aad ee ka soo
wareegtay markii gobolada koonfurta Soomaaliya ay xornimada ka qaateen
gumeytihii Taliyaaniga, iyo waliba israacii labada gobol ee Koonfurta iyo
Waqooyiga Soomaaliya, ayaa ka dhacday magaalada Boston ee xarunta gobolka
Massachusetts ee wadanka Mareykanka.
Munaasabada oo ay ka
qeyb galeen masuuliyiin kala duwan oo ay ka mid ahaayeen taliyihii hore ee
ciidamada xoogga dalka Soomaaliya Jeneral Daahir Aadan Cilmi (Indho Qarshe),
Xildhibaan Cabdulqaadir Maxamed Aadan (Sandheere) oo ka tirsan Baarlamaanka
Soomaaliya, Aqoon-yahano iyo qeybaha kala duwan ee Bulshada, ayaa waxaa
looga hadlay qiimaha uu lahaa halgankii xoriyadda iyo Madaxbanaanida
Soomaaliya.
Jen. Indho Qarshe oo ka
hadlay xafladaas, ayaa ku dheeraday ka hadalka qiimaha ay leedahay midnimada
dadka Soomaaliyeed, wuxuuna ugu baaqay qurba joogta Soomaaliyeed iney ka qeyb
qataan nabadda iyo xal u raadinta Soomaaliya.
Xildhibaan Cabdulqaadir
Maxamed Aadan, Boqor Cabdullahi Gurxan iyo Caaqil Maxamed Maxamuud Cismaan
Dacar oo iyagana ka mid ahaa dadkii munaasabaad ka hadlay, ayaa ku dhiiri
galiyay shacabka Soomaaliyeed iney ku dadaalaan soo celiyaan midnimadii iyo
walaaltinimada ka dhaxeyso.
Intii uu kulankaas
socday, ayaa dhanka qadka taleefoonka waxaa oga qeyb galay Danjiraha Soomaaliya
u fadhiyo Magaalada Washington DC ee dalka Mareykanka Amb. Axmed Ciise Cawad oo
munaasabada xoriyadda darteed ugu hambalyeeyay shacabka Soomaaliyeed.
Dhanka kale Suldaan
Mahdi Ahmed Ali oo ah Guddoomiye ku xigeenka Golaha Soomaalida dagan Gobolada
la isku dhaho New England, kana mid ahaa qaban-qaabiyaasha xaflada ayaa u
sheegay Hiiraan Online in munaasabadu ay aheyd mid si heer saro ah loo soo
agaasimay, si wanaagsana ay ogu dhammaatay.
Ugu danbeyn Isbuucii
aynu soo dhaafnay, ayaa inta badan dadka Soomaaliyeed waxey u dabaal-dageen 57
sano guuradii ka soo wareegatay Gugii Soomaaliya ay xoroowday ee 1960 iyo
xusaska maalinta xoriyadda iyo midowgii Soomaaliya.
Munasaabadaha loo
dabaal-dagay, ayaa kala ahaa 26 June oo gobolada Waqooyi ay madax-bannaani ka
qaateen gumeystihii Ingiriiska iyo 1 Luuliyo oo xambaarsan labo munaasabadood
oo kala ah, maalinta xornimada ay Koonfurta Soomaaliya ka qaadatay mustacmarkii
Taliyaaniga iyo israacii Waqooyiga iyo Koonfurta Soomaaliya.
Najah Mohamed Ali, Hiiraan Online
E-mail: [email protected]
Atlanta, Georgia – Mareykanka
