Baladweyne : Jahwareer ka dhashay isticmaalka lacagta Shiling Soomaaliga oo ka taagan magaalada
Axad, July, 02, 2017 (HOL) – Inta
badan waxaa xiran dhaqdhaqaaqii ganacsiga magaalada Baladweyne kaddib is
mari-waa ka dhashay isticmaalka lacagta shiling Soomaaliga oo ay ganacsatadu
diideen in ay wax ku iibsadaan.
Arintan ayaa timid kaddib markii xarrakada Al-shabaab ay ka mamnuuceen
deegaannada ay ka arimiyaan isticmaalka lacagta shiling Soomaliga.
Xoolaha iyo khudaarta loo Iib keeno magaalada ayaa inta badan ka yimaada ama soo mara deegaannada ay
maamulaan Al-shabaab, waan tan keentay in ganacsatadu ka biyo diidaan
qaadashada lacagta shilin Soomaaliga madaama aysan dib ugula noqon karin
deegaannada ay ka soo safreen.
Al-Shabaab ayaa deegaannada ay kaga sugan yihiin gobolka gobolka Hiiraan ka mamnuuceen lacagaha shilling Soomaaliga ee ka
yimaada gobolada dhexe iyo Puntland.
Magaalada ayaa lagu waramayaa in ay soo galeen lacago badan oo shiling Soomaali ah oo ganacsatadu kala
soo baxsanayaan Al-shabaab, taasoo keentay in sarifka $100 doolar gaaro wax ka
badan 4,000,000 oo shilin Soomaali ah halka markii hore uu ka ahaa 2, 800,
000.
Subaxnimadii hore ee saakay ayaa la arkayay inta badan ganacsiga magaalada
oo xiran iyo dadka oo wax iska weydiinaya isbadalka deg dega ee ku yimid shiling
Soomaaliga oo ah lacagta kaliya oo dadku ay heli karaan gaar ahaan
qoysaska danyarta oo ay ku adag tahay in
ay doolar wax ku iibsadaan.
Maamulka gobolka Hiiraan ayaa amray ganacsatada qaadashada lacagta shiling
Soomaaliga ah, iyaga oo dhinaca kalana sheegay in sharciga lala tiigsan doono
cid kasta oo lagu helo sarifka $100 doolar wax ka badan 2, 800, 000.
C/raxmaan Diini, Hiiraan Online
[email protected]