Axad, July, 02, 2017 (HOL) – Xiisad u
dhaxeysa dadka deegaanka iyo Al-shabaab ayaa lagu waramayaa in ay ka taagan
tahay deegaanka lagu magacaabo Warshuba oo ka tirsan gobolka Mudug.
Xiisadaan ayaa timid ka dib markii Al-Shabaab ay ku dhawaad 93 qof oo
isugu jira odayaal, ganacsato iyo waxgarad ay ku xireen deegaanka Warshubo oo
qiyaastii 90km dhanka galbeed kaga beegan degmada Xarardheere.
Saraakiisha Al-shabaab ayaa dadkan ku eedeynaya in ay ku guuldaraysteen in ay
ku wareejiyaan carruurtooda Al-Shabaab oo horey uga dalbatay in gacanta loo soo
galiyo si ay madaaristooda waxbarashada u geeyaan.
Dad ku sugan deegaanka oo diiday in magacooda la soo xigto sababo amni
darteed ayaa warbaahinta gudaha u sheegay in halkaasi ay abaabul dagaal
ka waddaan maleeshiyo hubeysan oo ku sugan miyiga degmada Xarardheere.
Al-Shabaab oo gacanta ku haya degaanno ka tirsan gobolka Mudug ayaa dhawrkii
todobaad ee ugu danbeeyay ku cadaadinayay odayaasha qabaa’ilka in ay keenaan
carruurtooda si loogu tarbiyeeyo afkaartooda, taasoo ay ku gacanseyreen dadka
deegaanka.
C/raxmaan Diini, Hiiraan Online
[email protected]
