Talaado, July, 18,
2017 (HOL) -- Guddida doorashooyinka Somaliland,
ayaa si cad u sheegay in labadda xisbi ee KULMIYE iyo WADDANI jabiyeen
xeerkii anshaxa ee ay saxeexeen,isla markaana talaabooyin ka qaadi
doonaan.
Guddida
doorashooyinka oo kulan la yeeshay wakiiladda saddexda xisbi ayaa markii uu
shirkaasi dhamaaday waxa warbaahinta la hadlay Guddoomiyaha guddida
doorashooyinka Cabdiqaadir Iimaan waxaanu sheegay qodobadda ay jabiyeen
labadaasi xisbi.
“Laba
xisbi qaran waxay ku gafeen xeerkii hab dhaqanka qaybinta kaadhadhka oo
ay si badheedh ah u jabiyeen marka gobolka Togdheer marayeen, waxay jabiyeen
qodobo ka mid ah kuwii lagu heshiiyey, qodobaasi si badheedh ah ayaa loo
jabiyey, qodobadda la jabiyey waa qodobka 3aad, 6aad, 7aad faqradiisa 13aad,
iyo faqradiisa 14aadba in labadda xisbi ee KULMIYE iyo WADANI si badheedh ah u
baalmareen xeerka anshaxa ee komishanka la saxeexdeen, taasna waxaanu ka soo
saari doonaa go’aan cad, waxaana u gudbin doonaa labadda xisbi,”ayuu yidhi
Cabdiqaadir Iimaan.
Laakiin
gudoomiyuhu ma sheegin waxay ku ciqaabi doonaan cidii jabisay xeerkaasi la wada
saxeexay.
Dhinaca
kale, waxa iyaguna ka hadlay saddexda xisbi qaran,kuwaas oo soo dhoweeyey
go’aanka guddida doorashooyinka qaranka.
xoghayaha
guud ee xisbiga WADANI Maxamed Uurcadde, waxaanu yidhi “Xeerka anshaxa
haddii la inagu helo wixii aanu ku heshiinay wax ka duwan diyaar baanu u nahay
in wixii komishanku nagu xukumo aanu qaadano, waxaana jecelahay in shuruucda
qaranka loo wada hogaansamo”
Muxumed
Axmed oo wakiil ka ah xisbiga KULMIYE waxa uu yidhi “ Haddii aanu nahay xisbi
xaakinkii wixii halkaasi ka dhacay waanu qaadanaynaa, waxaanu xisbiga iyo
taageerayaashiisa gaadhsiin doonaa wakiilna kaga nahay inaanu ilaalino sharciga
u yaala doorashooyinka qaranka, hadba kii duruuftiisa taagan yahay in la
ixtiraamo ayaanu halkan ugu gudbinaynaa, wixii sharciyan naga qabtana”.
Xisbiga
UCID oo isagu hore labadda xisbi ee kale ugu eedeeyey inay ku xadgudbeen
xeerkii anshaxa ah ee lagu saxeexay, waxaana u hadlayey Cabdinaasir Qodox,
waxaanu yidhi “waanu hambalynayna go’aankaasi Komishanku qaateen,
xeerkaasi anshaxa ee aanu kala saxeexanay go’aankii ay ka soo saareen iyaga waanu
ku hambalyeyna go’aankooda waanu sugayna, xisbiyada waxaan ku guubaabinaya inay
dhawraan wixii la kala saxeexday”.
Labadan
xisbi ayaa lagu eedeeyey inay bilaabeen olole aan loo fasaxin,isla markaana
deegaanadii ay mareeyeen dadku ku soo dhoweynayeen calamaddi xisbi, taas
oo hore looga digay.
Barkhad-ladiif
M. Cumar, Hiiraan Online
[email protected]
Hargeysa,
Somaliland.
