Talaado, July, 18, 2017 (HOL) -- Gobolka
Washington ayaa waxaa ka bilowday doorashooyinka is reeb reebka ee loogu
tartamayo kuraasta iyo guddiyada maamula gobolkaasi taasoo dhici doonta bisha
November ee sanadkan.
Dadka tartankaasi ku jira waxaa ka mid ah Axmed Ismaaciil Cabdi oo ka mid ah
Soomaalida deeggan gobolkaasi oo u tarmamaya mid ka mid guddiga 5-ta ah ee
maamula garoonka iyo dekedda ee gobolkaasi, isagoo u tartamaya kursiga degaanka
King County ee magaalada Seattle ee gobolkaasi.
Isaga oo ka hadlayay waxa ku qasbaya in uu u tartamo xilkan
ayaa yiri’’ Magaaladan waxaay leedahay dekeda iyo Airport aad u weyn, haddii
aynu nahay dadka African –ka ah ama Soomaalida waa meelaha ugu waaweyn ee
dhaqaalaha uu naga soo galo, sidaa daraadeed muhiim weyn ayeey inoo leedahay in
aan u tartanno kursigan taas dardeed ayaa igu qasabtay in aan ka mid noqdo
tartamayaasha’’ ayuu yiri Axmed Ismaaciil Cabdi.
Waxaa uu sheegay in tartanka uu ku jiro uu quseeyo labadaba
dekedda iyo Airport oo leysku daray,
madaama ayuu yiri Soomaalida halka ugu badan oo ay ka shaqeystaan ay tahay
labada dhinac ee kala ah Dekedda iyo Airport.
‘’In Qof dadka ay garanayaan uu soo gallo gudiga maamula
gobolkaas muhiimad weyn ayeey u leedahay dadka Soomaalida iyo Africaanka intaba, madaama inta badan dadka qaarada ka
soo jeeda iyo kuwa Soomaalida ay ka xoogsadaan ama ka shaqeystaan labada
xarumood ee dhaqaalaha ugu badan uu ka soo gallo ee Dekedda iyo Airport’’ ayuu
yiri Axmd Ismaaciil Cabdi.
Axmed waxa uu hadda ka mid yahay guddiga maamula guryaha ay ku nool yihiin
qoysaska uu dhaqaalahoodu yar yahay ee Magaalada Seattle ee gobolkaasi.
Xigasho : VOA
C/raxmaan Diini,
Hiiraan Online
[email protected]