Xisbiga mucaaradka ah ee WADDANI oo eeddo usoo jeediyey xukuumadda iyo xisbigeedda
Isniin, July, 17, 2017 (HOL) – Xoghayaha guud ee xisbiga mucaaradka ah ee WADDANI, Maxamed
Cabdilaahi Uurcade ayaa sharci daro ku tilmaamay in ciidamo lagu wareejiyo oo
la xidho Xafiisyadii xisbiga WADDANI uu ku lahaa magaalooyinka Gabiley, Nasiye
iyo Qoyta, waxaanu xukuumada Kulmiye ugu baaqay in si dhakhso ah ay uga qaadaan
ciidamadaasi.
Maxamed
Cabdilaahi Uurcade, Xoghayaha Xisbiga Waddani waxa uu sheegay in xisbiga
Waddani aanu marnaba aqbali doonin sharci daro lagu xidho Xafiisyadooda,
taageerayaashooda iyo Masuuliyiintooda gobolada dalka u joogta.
“Gabiley
si sharci daro ah oo aan waafaqsanayn shuruucda dalka oo hanjabaad iyo cago
juglayn ah ayaa ciidankii qaranka xafiiskii Waddani loogu wareejiyey, iyadoo
muwaadinkii uu ka kireeyey nootaayadii ay kala qorteen wax ka dhimanina aanay
jirin, muwaadiniina ay yihiin dalka leh, xaqna u leh cidina aanay u diidi
karin.”ayuu yidhi Uur-cadde.
Waxaanu
intaas ku daray “Waxaanu xukuumada Somaliland iyo xisbiga Kulmiyeba uga
digaynaa oo aanu leenahay si degdeg ah ha uga qaadaan ciidankaa ay ku xeereen
hadii ay ka qaadi waayaan sharci darada xisbiga Waddani marna ma aqbalayo, wax
waloo ay ku kalifaysana yeeli maayo wax sharci daro ah iyo caga-juglayna in
Kulmiye iyo xukuumada oo isku duubani ay sameeyaan, kana aqbali mayno Gabiley
iyo Qardho-toona ka yeeli mayno.”
Xoghayaha
Guud ee Xisbiga Waddani mar uu ka hadlayey Shaqaalaha dawlada ee ololaha
xisbiga Kulmiye ka dhex muuqda ayaa waxa uu yidhi “Waxaa kale oo iyaduna soo
baxaysa in olole ay ku jiraan Maareeyeyaal, Agaasimayaal in dhamaan shaqaalihii
xukuumadu uu si toos ah ugu jiro olole oo uu ka ololaynayo bari iyo galbeedba,
Madaxweyne ku xigeenkuna amar bixiyey laakiin aan amarkii la raacayn, waxaanu
leenahay waxa uu dalku dal ku yahay, dadkuna ay dad ku yihiin, xisbiyaduna ay
xisbiyo ku yihiin waa nidaamka, Kulmiye nidaamka ha u soo noqdo.”
Sidoo
kale, waxa uu dhaliilay wasiiro roog cas loo dhigay oo olole ugu jira
xisbiga,isla markaana sidii madaxweynaha oo kale loo soo dhoweynayo, taas oo
sharci daro ku tilmaameen.
Barkhad-ladiif
M. Cumar, Hiiraan Online
[email protected]
Hargeysa,
Somaliland