Axad, July, 16, 2017 (HOL) – Shirkadda Al-Bayrak ayaa maanta dowladda
Soomaaliya ku wareejisay qalab-loogu tala galay Dekedda Muqdisho, kaasi oo
isugu jira qalabka Rarida iyo dejinta.
Qalabkan oo si gaar ah loogu wareejiyay wasiirka dekeddaha Soomaaliya Maryan
Aweys ayaa isugu jira Wiishas, Agab lagu qaado xamuulka, Cagaf-cagaf iyo Qalab
kale.
Wasiirka Dekadaha Soomaaliya Maryan Aweys oo warbaahinta kula hadashay
gudaha Dekadda ayaa waxaa ay sheegtay qalabkan uu muhiim u ahaa Dekadda, wax
badan uu ka tari doono.
Waxaa ay sheegatay muhiim in ay aheyd qalabkan in mar hore la keeno, laakiin
howlo badan oo jiray awgeed ay dib u dhaceen, balse wixii hada ka dambeeya lagu
fududeyn doono shaqada Dekadda.
Wasiirka ayaa u mahad celiysay shirkadda Al-Bayrak, waxayna ka codsatay in
ay kordhiyaan dadaalka ay wadaan oo ay ku hormarinayaan dib u dhiska dalka.
Sidoo kale Wasiir Maryan ayaa sheegtay Dekadda in ay tahay laf dhabarta
dalka, lana rabo in howlaheedii ay sii socdaan oo aysan hakad gelin.
Dhinaca kale Axmed Saami oo ah mas’uulka shirkadda Al-Bayrak ee Dekadda ayaa
sheegay haddii ay yihiin shirkadda Al-Bayrak in ay ku dadaalayaan mar walba in
ay keenaan wax walba oo looga baahan yahay.
Waxaa kaloo uu sheegay Axmed Saami qalabkan ay keeneen in uusan halkan ku
ekaan doonin oo agabyo kale ay keeni doonaan, isaga oo Alle ka baryay qalabkan
in uu noqdo mid ummadda Soomaaliyeed ay ku faa’idaan.
Shirkadda Al-Bayrak ayaa ah shirkadda gacanta ku heysa Dekadda Muqdisho,
waxaana ay ka qeyb ka aheyd shirkaddihii
ka qeyb qaatay in ay wax ku bixiyaan Abaaraha ku dhuftay Soomaaliya.
C/raxmaan Diini, Hiiraan Online
[email protected]