Axad, July, 16, 2017 (HOL) –Wararka naga soo gaaraya gobolka Gedo ee
Koonfurta Soomaaliya ayaa sheegaya duqeyn lagu beegsaday goob ay ku sugnaayeen
saraakiil ka tirsan Al-shabaab sida laga soo xigtay mas’uuliyiin maamulka.
Gudoomiye ku xigeenka amniga maamulka gobolka Gedo Cismaan Nuur Xaaji oo la
hadlay warbaahinta ayaa sheegay in duqeyntaasi lagu dilay ku dhawaad 40 ruux oo
isugu jira saraakiil iyo askar ka tirsan Al-shabaab.
Waxaa uu sheegay in la dilay saddex ruux oo ajaanib ah oo mid ka mid ah uu
yahay Cadaan, halka labada kalena uu ku sheegay in ay ahaayeen ajaanib ka soo
jeeda qaarada Africa.
Marka laga soo tago sheegashada maamulka Gedo, ma jiraan ilo madaxbanaan oo
warbaahinta u qaxiijinaya duqeynta la sheegay in lagu bartilmaameedsaday
Al-shabaab.
Deegaanka Kabis oo duqeynta ay ka dhacday ayaa ku dhaw magaalada Garbahaareey
ee gobolka Gedo, waana deeganada ay maamulaan Ururka Al Shabaab.
Al-shabaab ayaa wali kama aysan hadlin warka ka soo baxay maamulka Gedo ee
la xiriira duqeyntan.
C/raxmaan Diini, Hiiraan Online
[email protected]