Sabti, July, 01, 2017 (HOL) – Madaxweynaha
Maamulka Galmudug Axmed Ducaale Geelle Xaaf ayaa sheegay in maamulkiisa uu wada
hadalo la geli doono Ururka Ahlu Sunna ee fadhigiisu yahay magaalada Dhuusa
Mareeb.
Madaxweynaha Galmudug oo la hadlayay Idaacada VOA ayaa sheegay in muddo dhow
ay ku rajo weyn yihiin inay is hor fariistaan, si loo xaliyo khilaafka jira.
“Anaga iyo Ahlu Sunna dad kala soocan oo kala fog ma nihin, waxaa rajo weyn
ka qabaa muddo dhow inaan is fahano oo aan ka heshiino wixii jira”ayuu yiri
Madaxweynaha Galmudug.
Waxaa uu sheegay in wixii awood qeybsi ah laga hadli doono marka la heshiiyo
oo la wada hadlo, hase ahaatee waxaa uu soo jeediyay in la isu furo labada
dhinac ee ay ka kala taliyaan.
“Waxaan soo jeedinayaa in la is dhex maro oo si caadi ah la isku dhex maro,
hada ciidamadeena waxay joogaan Godinlabe, ayagana waxay joogaan Mareergur,
marka in la kala qaado difaacaas yaala aad ayay muhiim ugu tahay wada
hadalada”ayuu yiri Madaxweynaha Galmudug.
Madaxweynaha Galmudug ayaa sheegay in ay rajo ka qabaan in labada bilood ee
soo socota lagu dhameyn doono wixii khilaaf ee ka dhex jira.
Ahlu Sunna ayaa wali siweyn uga oo horjeeda
maamulka fadhigoodu yahay magaalada Cadaado, oo ay arkaan dhismihiisa aan loo
marin sharci iyo wadatashig bulsho.
C/raxmaan Diini, Hiiraan Online
[email protected]
