Sabti, July, 01, 2017
(HOL) – Shaaha magaciisa la yidhaahdo
SHAAHYAHAN MASTER TEA ayaa suuqa la soo galiyey isagoo dhacay oo la bedelay
taariikhda warshadda uu ka soo baxay ku muujiyey dushiisa inuu dhacayo.
Shirkadda
keenta Shaahan cusub oo ah nooc xidhmooyin ah ayaa si aanay dadku u dareemin
taariikhdii dhicitaankiisa loo bedelay, waxaana halka ay taariirkhdii uu dhici
lahaa ku taallo lagu dhajiyey waraaq ay ku qoran tahay taariikh cusub oo
muujinaysa in aanu wali dhicin, haseyeeshee haddii waraaqda sare ee taariikhda
cusub ku taallo ka fujiso, waxaad arkaysa taariikhdii warshaddu ugu tallogashay
oo ah mid dhacday.
Siciid
Yuusuf Xuseen (Siciid Carab) ayaa sheegay in uu si kadis ah xidhmo shaah ah
usoo iibsaday uu arkay in taariikhdii dhicitaanka laga bedelay,isla
markaana taariikh cusub lagu dhajiyey, haseyeeshee nasiib wanaag inta aanu
Shaahi Karin uu si lama filaan ah uga jaray Istiikar lagu qoray taariikhda
cusub ka dibna uu arkay taariikhdii uu dhacay oo la qarinayey taas oo layaab
iyo fajiciso ku noqotay.
“Waxaan
tukaan aanu jaar nahay ka soo iibsaday Shaah madow, markii aan guriga imid
waxaan arkay taariiikhda ku qoran oo aan wali dhicin, hasse ahaatee markii
waraaqda sare ee taariikhda ku qoran tahay ka fujiyey ama ka gooyey waxaa
arkay taariikhdiisii caadiga ahaa ee warshaddu ku soo samaysay oo ku taalla
wuxuuna noqday Shaah dhacay, laakiin ganacsatadeena ayaa taariikhda ka soo
bedeshay oo dadkeena ka iibinayey”sidaas waxa yiri Siciid Yuusuf Xuseen oo ah
muwaadinka laga soo iibiyey Shaahan.
Siciid
Carab waxa uu sheegay in sanad kala horeeyaan taariikhda ku dhajisan shaahan,
waxaanu yidhi “Shaahu wuxuu dhacay 10/4/2017, haseyeeshee ganacsatadda dalka
keentay waxay dhakadda sare kaga soo dhajiyeen taariikh aan ahayn taariikhda uu
dhacay oo dadka la tusayo in aanu dhicin, waxaana lagu soo dhajiyey 01/10/2018
inuu dhici doono, waxaana labdaasi taariikhood u dhexeeya waa sanad la doonayo
in dadka laga iibiyo”
Shaahan
dhacay ee dadka laga iibinayo waxa magaciisa la yidhaa Shaaahyahan Master Tea,
waxaana kartoonkiisa ku yaala Erayo suugaan ah oo lagu amaanayo shaahan dhacay
si dadka loogu xayeysiiyo, erayada lagu amaanayo shaahan waxa ka mid ah “Waa
Shaah macanno, midab iyo udgoonloo, naftu ay u muhatoo, laga wada
mamsuudee meel kasta oo aad joogtaba ha moogaanin Shaahyahan Master TEA”
Ganacsatadda
Somaliland qaar kamid ayaa si ula kac ah magaaladda Hargeysa u keenna Raashin
dhaca, iyagoo taariikhda uu raashinkaasi dhacayo qariya inta ay taariikhdii
hore bedelaan.
Muwaadin
reer Somaliland ah ayaa soo bandhigay Shaah cusub oo dalka yimid oo taariikhdii
uu dhacayey inta la qariyey Istiikar kale oo taariikh cusub leh lagu dhajiyey
si ay dadku u moodaan in aanu dhicin.
Dadweynaha
Somaliland ayaa baryahan dambe ka walaacsan Raashimada dhacay ee suuqyadda
magaaladda Hargeysa ku soobadanaya, waxaana inta badan dalka keena waa
muwaadiniin ganacsato ah oo dadkoodda doonaya inay sun ka waraabiyaan si ay uga
macaashaan dhiiga dadkoodda.
Dhinaca
kale, dadweynuhu waxay ku dhaliilayaan xukuumadda oo keeni wayday mishiinkii
lagu baadhi lahaa Raashinka dhacay iyo kuwo aan tayadda lahayn, si dadka
caafimaadkooda loo ilaaliyo, waxaanay dadweynuhu u ciil qabaan cidii ka qaban
lahayd dhiig miiratadda ganacstadda ee dadkoodda u keenay Raashinka dhacay ee
waliba macaashka badan ka raadinaya.
Barkhad-ladiif
M. Cumar, Hiiraan Online
[email protected]
Hargeysa,
Somaliland.
