Jimco, Janaayo, 20, 2017 (HOL) – Abaarta ka jirta Soomaaliya
oo marba marka ka danbeysa u muuqata mid sii xumaneysa ayaa sababtay in xoola
dhaqatada qaarkood nafta is dhaafiyaan kadib marka ay arkaan xoolihii ay
dhaqaneyeen oo gabi ahaanba meesha ka baxay.
Wararka ka imanaya deegaanka Bacaad-weyn ee gobolka Mudug
ayaa sheegaya in nin ka mid ahaa reer guuraaga halkaa ku dhaqan uu is dilay.
Guddoomiyaha deegaanka Baacaad-weyn Fu’aad Yaasiin ayaa
warbaahinta u sheegay in ninkan is dilay lagu magacaabi jiray Faarax Dheere oo
la sheegay in markiisii hore uu ka mid ahaa dadkii ka soo barakacay gobolka
Nugaal.
Guddoomiyaha ayaa sheegay in ninkan uu lahaa geel aad u badan
oo dhamaantood ku baxay ama ku dhintay abaarta ka jirta deegaannada gobollada
dhexe, taasoo keentay in uu go’aasado markii danbe in nafta uu is dhaafiyo.
Marka laga soo tago dadkan la sheegay in ay is dileen siddoo
kale waxaa jira xoolo dhaqato dhimirka laga galay [Waashay] iyaga oo u adkeysan waayay nolasha adag ee laga dhaxlay abaarta.
Kiisaska noocan oo kale ah ayaa ah kuwo maalmihii ugu
danbeeyayb ka soo yeeray deegaanno kala gadisan oo ka tirsan Soomaaliya, taasoo muujineysa heerka abaarta jirta oo ah
mid aad u darran oo saameyn ku yeelatay dadka iyo duuniyada intaba.
C/raxmaan Diini, Hiiraan Online
[email protected]
