Kulamo iyo shirar ka soconaya Cadaado kadib shaqaaqo dad ay ku dhinteen oo shalay ka dhacay
Arbaco, Janaayo, 18,
2017 (HOL) - Wararka naga soo gaaraya
degmada Cadaado ee xarunta KMG u ah
maamulka Galmudug ayaa sheegaya in ay socdaan kulamo iyo shirar lagu xalinayo
xiisada siyaasadeed ee halkaa ka jirta, kaddib iska horimaad ay dad ku dhinteen
oo maalintii shalay halkaa ka dhacay.
Odayaasha iyo wax garadka degmada oo tan iyo shalay ku
howlanaa sidii xiisada loo dajin lahaa ayaa sheegay in aan loo dulqaadan doonin
shaqaaqo danbe oo ka dhacday degmada oo ka mid ah ah deegaannada ugu amaanka
badan gobollada dhexe.
Dadka ku dhaqan degmada Cadaado ayaa cabsi ka qaba dagaal mar kale dhaxmara ciidamada kala taabacsan madaxtooyada iyo
xildhibaannadii dhawaan kalsoonida kala laabtay Cabdikariin
Xusseen Guuleed, kuwaa oo wada dhaqdhaqaaqyo militari.
Qaar ka mid ah xildhibaannada Galmudug ayaa ku eedeeyay
falkii maalintii shalay ka dhacay degmada madaxtooyada oo ay ku sheegeen in
laga soo abaabulay ciidamada weeraray xarunta ay ku shiraan xildhibaannada.
Ugu danbeyntii, hoteellada iyo goobaha muhiimka ah ee magaalada ayaa lagu arkayaan
ciidamo hubeysan oo amniga siweyn u sugaya.
C/raxmaan Diini, Hiiraan Online
[email protected]
