Talaado, Janaayo, 17, 2017 (HOL) -Kulan loogaga
hadlayay abaaraha ayaa maanta lagu qabtay magaalada Muqdisho iyadoo
kulankaasina ay goobjoog ka ahaayeen saraakiil ka socotay Qaramada Midoobay iyo
guddoomiyaha baarlamaanka Soomaaliyeed Maxamed Shiikh Cismaan Jawaari iyo weliba guddoomiye ku xigeenada baarlamaanka.
Shirkan oo lagu qabtay xarunta ay qaramada
midoobay ku leedahay magaalada Muqdisho ee Xalane, ayaa si weyn loogaga
hadlay sidii loogaga hortagi lahaa dhibaatooyin ka dhasha abaaraha iyo sidii
loogaga hortagi lahaa macluul ay sababto abaarta.
Shir jaraa’id oo ay qabteen mas’uuliyiintii ka
qeybgashay kulankan ayaa waxaa uu guddoomiyaha baarlamaanka Maxamed Shiikh
Cismaan Jawaari uu sheegay in dowladda ay wax kasta oo suuragal ah samayneyso
si loogu gurmado dadka abaarta ay ku habsatay.
Isu-duwaha Qaramada Midoobay u qaabilsan arrimaha
bani’aadannimada ee Soomaaliya Peter de Clercq oo ka hadlay shirka jaraa’id
ayaa sheegay inin xaaladda abaarta Soomaaliya ay meel xun marayso, ka dib
markii ay curan waayeen roobabkii gu’ga iyo deyrta ee la filayay sanadkii
tegay.
De Clercq ayaa sidoo kale sheegay in abaarta ay
dhalisay in ay sare u kacaan qiimaha lagu kala iibsado biyaha iyo cuntada ayna
xaaladda abaarta ay kasii dari karto xilliga jiilaalku uu yahay bilow.
“Inta badan caalamadihii ka horeeyay abaartii
2011 ayaa hadda muuqda. Waxbadan waxa ku xiran yihiin roobka gu’ga ee la filayo
bisha April ee soo socota. Balse saadaasha roobkaasi ma aha mid wanaagsan.”
ayuu yiri Peter de Clercq.
Ugu danbeyntii, abaarta oo ka jirta inta badan
Bariga Afrika, ayaa si weyn u saamaysay deegaannada Soomaalida, waxaana ku
xoola beelay dad badan.
C/raxmaan Diini, Hiiraan Online
[email protected]
